Ýurdumyzda ilatyň saglyk abadançylygyny pugtalandyrmak ugrunda yzygiderli edilýän tagallalara mysallar köp. Milli Liderimiziň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna häzirki wagta çenli ýüzlerçe näsag çaganyň saglygynyň dikeldilmegi, ýurdumyzyň ähli künjeklerinde hereket edýän çagalar hassahanalaryna dünýäniň iň kämil saglygy goraýyş enjamlarynyň ornaşdyrylmagy bolsa bu babatda aýratyn bellenilmäge mynasyp.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy öz işini başlaly bäri müňlerçe çaganyň ykbalyna nur, maşgalalaryna şatlyk eçildi. Şoňa görä-de, gaznanyň döredilmeginiň 4 ýyllygy mynasybetli geçen ýylyň 29-njy martynda Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatyň Jemleýji resminamasy BMG-niň resmi dillerine terjime edildi hem-de Baş Assambleýanyň 79-njy sessiýasynyň gün tertibiniň resminamasy hökmünde ýaýradyldy.
Halkymyzyň ynsanperwer ýörelgeleriniň häzirki wagtda döwlet derejesinde mynasyp dowam etdirilmegi diňe bir durmuşymyzy gözelleşdirmek bilen çäklenmän, şol bir wagtda hoşniýetli goňşuçylyk däpleriniň pugtalanmagyna-da oňyn täsirini ýetirýär. Golaýda, has takygy, mübärek Oraza aýynyň dowam edýän günlerinde Eýran Yslam Respublikasynyň halkyna we çagalaryna Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan ynsanperwerlik ýüküniň ugradylmagy munuň aýdyň subutnamasy boldy.
Gaznanyň goldaw bermeginde dürli ýyllarda Türkiýe Respublikasynyň, Russiýa Federasiýasynyň, Täjigistan Respublikasynyň, Owganystanyň, Ukrainanyň we Palestinanyň çagalaryna ynsanperwerlik ýükleriniň ugradylandygyny buýsançly bellemek gerek. ÝUNISEF-niň Türkmenistandaky wekilhanasy tarapyndan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna kömege mätäç çagalara lukmançylyk hyzmatlarynyň berlendigi we olaryň ýagty geljege bolan umytlaryny pugtalandyrmaga goşan goşandy üçin güwänamanyň, şeýle hem bu düzümiň ýurdumyzdaky wekilhanasynyň Hoşallyk hatynyň gowşurylmagy sahawatlylyk ýörelgelerimiziň halkara ykrarnamasydyr.
Gurbansoltan ALLABERDIÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby.
