Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Arkadag şäherine amala aşyran iş saparynyň dowamynda «Jahan» döredijilik merkeziniň täze konsepsiýasy bilen tanyşdyryldy. Habar berlişi ýaly, bu merkez geljekde çagalaryň we ulularyň hemmetaraplaýyn ösmegi üçin niýetlenen köpugurly desga öwrüler.
Täze merkezde nämelere garaşylýar?
«Watan» habarlar gepleşiginiň maglumatyna görä, Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti O.Atabaýewa merkeziň täze mümkinçilikleri barada durup geçdi. Taslama laýyklykda bu ýerde :
- Bilim bölümi: Daşary ýurt dillerini öwrenmek üçin lingafon otaglary, dizaýn we marketing ýaly döwrebap hünärleriň esaslaryny öwredýän ders otaglary.
- Sport we Saglyk: Üsti açyk we ýapyk sport meýdançalary, fitnes zallary. Şeýle-de, sagdyn durmuş ýörelgesini berkitmek üçin ýoga, saýkl we elastik ýaly beden taplaýjy maşklara aýratyn orun berler.
- Maşgala üçin amatlyklar: Çagalar bilen bir hatarda, ata-eneleriň hem peýdaly wagt geçirmegi üçin ýokary derejeli şertler dörediler.
Täze goşulan sport we saglyk mümkinçiliklerini nazara alyp, bu desga geljekde «Jahan» döredijilik we sport merkezi diýlip atlandyrylmagy teklip edildi. Milli Liderimiz bu teklibi makullap, çagalaryň isleglerini we höweslerini öwrenmegiň, olary dogry hünärlere ugrukdyrmagyň ähmiýetini aýratyn belledi.
Arkadag şäherindäki bu täze merkez geljekki nesilleriň hem beden, hem ruhy taýdan kämil bolup ýetişmegine uly goşant goşar diýlip garaşylýar.
