2026-njy ýylyň 22-nji aprelinde Aşgabat atçylyk sport toplumynyň açyk manežinde atly sportuň päsgelçiliklerden böküp geçmek (konkur) görnüşi boýunça ýaryş geçirildi.
Bäsleşigiň düzgünnamasyna laýyklykda, gatnaşyjylar üç tapgyrda güýjüni synadylar. Oňa ýurdumyzyň iň saýlama bedewleriniň 10-sy gatnaşyp, olar birinji hem-de ikinji tapgyrlarda, degişlilikde, 110 santimetr, soňra bolsa 120 santimetr beýiklikdäki päsgelçiliklerden yzygiderli böküp geçdiler. Maneždäki gyzgalaňly we dartgynly pursatlar jemleýji tapgyrda has-da aýdyň duýuldy. Bu tapgyrda bedewler 130 santimetr beýiklikdäki çylşyrymly böwetlerden bökdüler. Bäsleşigiň jemi jemlenende, esasan, päsgelçiliklerde jerimesiz ýa-da az jerime alan, şeýle hem gysga wagt netijesini görkezen atly türgenler tapawutlandylar.
«THE ASHGABAT TIMES».
