Halkymyzyň şöhratly taryhyna, şu gününe ser salanymyzda, türkmen bedewleriniň ähli döwürde-de gadyr-gymmatynyň ýokarydygyna magat göz ýetirmek bolýar. Çünki ahalteke bedewlerimiz wagt ölçeginiň çäginden çykyp, ähli eýýamlaryň hem-de heňňamlaryň arzyly gymmatlygyna öwrüldi. Bu günki gün bolsa dal bedewlerimiziň arşyň owazyna deňelýän kişňeýşi parahatçylygyň simfoniýasy, ýurdumyzyň beýik ösüş-özgerişleriniň gaýtalanmajak mukamy bolup ýaňlanýar.
Halkymyzyň şan-şöhraty sungat derejesine ýetirilen «atçylyk sungaty» ýa-da «seýisçilik sungaty» diýlen düşünjelerde jemlenýär. Gahryman Arkadagymyz halkymyzyň watançylygynyň, ynsanperwerlik ýörelgeleriniň kemala gelmeginde bedewleriň ornuny ussatlyk bilen açyp görkezýän «Atda wepa-da bar, sapa-da» atly kitabynda şeýle diýýär: «Sungat döretmek öz-özüň bolmakdyr, özüňdäki tebigylygyňy açmakdyr. Adamlara mahsus iň hakyky baýlygyň sungatda ýaşaýandygyna men berk ynanýaryn. «Hakykat her kimiň özünde» diýlen pähimli jümleler bardyr. Bu adamyň ruhy baýlygyň eýesidiginiň tekrarlanmasydyr. Ruhy baýlyk — bu sungat döretmekdir».
Atçylyk sungatynyň kemala gelmeginde we ösmeginde halkymyzyň goşan goşandynyň juda uludygyna taryh şaýat. Meşhur alymlaryň ylmy barlaglary, gazuw-agtaryş işleriniň netijesinde tapylan tapyndylar, gadymy döwürlerde ýaşap geçen akyldarlaryň taryhy maglumatlary bularyň üstüni ýetirýär. Dünýäde ençeme döwletleri guran şöhratly halkymyzyň bedewlere bolan söýgüsiniň zandyna ornandygy bolsa ata-babalarymyzyň atşynaslyk sungatynyň ösmegine goşan saldamly goşandynyň anyk delilidir. Dünýäniň islendik künjeginde şan-şöhrata eýe bolan ahalteke bedewlerimiz atçylyk sungatynda öz tebigylygyny — wepalylygy, merdanalygy, gözelligi açan halkymyzyň köňül gülzarlygynyň janly şekilde ýüze çykmasydyr.
Ajaýyp döwrümiziň bezegi bolan behişdi bedewlerimiziň baýramy bu gün ýurdumyzda uludan bellenýär. At çapdyrylýar, altyn gabak atdyrylýar. Goý, türkmen bedewleriniň bagtyň owazyna meňzeş kişňemesi toý-baýramlarymyzda hemişe ýaňlanyp dursun!
Gülnäzik AGAÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
