Ýakynda Mary welaýat Baş bilim müdirliginiň guramagynda Baýramaly şäheriniň rus dilini çuňlaşdyryp öwredýän ýöriteleşdirilen 18-nji çagalar bakja-bagynda «Mekdebe çenli çagalar edaralarynda körpelere daşary ýurt dillerini öwretmegiň döwrebap usullary» atly welaýat derejesinde usuly-amaly maslahat geçirildi.
Bu usuly-amaly maslahat «Garaşsyz, baky Bitarap Türkmenistan ― bedew batly at-myradyň mekany» ýylymyzda Mary welaýatynyň çäginde geçen üç ýylyň dowamynda daşary ýurt dillerini çuňlaşdyryp öwretmek boýunça ýöriteleşdirilen çagalar bakja-baglarynyň iş tejribeleriniň netijeliligini öwrenmek, çagalaryň rus we iňlis dillerinde çuňlaşdyrylan bilimlerini özleşdirmek, daşary ýurt dillerini okadýan mugallymlaryň okatmagyň usulyýetini kämilleşdirmekde, milli we halkara tejribeleri üstünlikli durmuşa geçirmekde öwrenen täze iş usullaryny ýüze çykarmak, bu ugurda okatmagyň utagşdyrylan, interatiw usullaryndan, oýun usullaryndan we görkezme, paýlama esbaplardan peýdalanmak mümkinçilikleriniň hilini we mazmunyny baýlaşdyrmak, özara tejribeleri alyşmak, gazanylan üstünlikleri wagyz etmek we ýaýratmak, täze pedagogik tärlere we ýaş hünärmenleri netijeli iş usullaryna höweslendirmek, bu ugurda halypa-şägirtlik we maşgala gatnaşyklaryny berkitmek maksady bilen Mary welaýat Baş bilim müdirliginiň degişli iş meýilnamasy esasynda guraldy.
Usuly-amaly maslahata welaýat Baş bilim müdirliginiň hünärmenleri, şol sanda Mary şäheriniň rus dilini çuňlaşdyryp öwredýän ýöriteleşdirilen 21-nji çagalar bakja-bagynyň, Mary şäheriniň rus dilini çuňlaşdyryp öwredýän ýöriteleşdirilen 47-nji çagalar bakja-bagynyň, Mary şäheriniň iňlis dilini çuňlaşdyryp öwredýän ýöriteleşdirilen 49-njy çagalar bakja-bagynyň, Mary şäheriniň 16-njy ýöriteleşdirilen orta mekdebiniň mekdebe taýýarlyk bölüminiň, Ýolöten etrabynyň iňlis dilini çuňlaşdyryp öwredýän ýöriteleşdirilen 12-nji çagalar bakja-bagynyň, Türkmengala etrabynyň iňlis dilini çuňlaşdyryp öwredýän 8-nji çagalar bakja-bagynyň we bäsleşigiň geçirilýän ýeriniň ýolbaşçylary, terbiýeçi-usulyýetçileri, daşary ýurt dillerini okadýan mugallymlar we çagalar toparlary gatnaşdy.
Usuly-amaly maslahat gün tertibine laýyklykda iki tapgyrda dowam etdi. Günüň birinji ýarymynda usuly tapgyr, ikinji ýarymynda amaly tapgyr guraldy. Mary welaýat Baş bilim müdirliginiň başlygynyň orunbasary O.Annageldiýewanyň çykyşy bilen usuly çäre açyldy we çagalaryň daşary ýurt dillerindäki joşgunly çykyşlary bilen usuly-amaly maslahatyň birinji tapgyryndaky sapaklara syn edildi.
Orta bag we uly (mekdebe taýýarlaýyş) toparlarda, 4-5 we 5-6 ýaşly çagalaryň gatnaşmaklarynda okuw otaglarynda «Geçilenleri gaýtalamak», «Знакомства с овощами», «Овощи и фрукты» diýen temalar boýunça rus dilinde, «My body», «Food and drinks» diýen temalarda iňlis dilinde we ýönekeý matematiki düşünjeler sapagy boýunça «Sanlar» diýen temada adaty däl, işjeň we interaktiw görnüşlerde daşary ýurt dillerini çuňlaşdyryp öwredýän ýöriteleşdirilen çagalar bakja-baglaryň mugallymlary sapaklar geçdiler. Sapaklardan soň çagalar bilen gysgaça sorag-jogaplar alyşyldy.
Bellenilen wagtda berlen arakesmeden soň usuly-amaly maslahatyň işi amaly tapgyr arkaly dowam etdi. Şunda «Günüň II ýarymynda teatrlaşdyrylan oýunlaryň üsti bilen daşary ýurt dillerini öwretmegiň ýollary», «Mekdebe çenli çagalar edaralarynda inklýuziw bilimiň girizilmegi we mümkinçilikleri çäkli çagalaryň bilimini, terbiýesini oýunlar arkaly ösdürmek», «Mekdebe çenli çagalar edaralarynda iňlis dilini öwretmekde sanly tehnologiýalaryň ähmiýeti», «Mekdebe çenli çagalar edaralarynda dilleri okatmakda täzeçil usullardan peýdalanyp, pedagogik ussatlygy ýokarlandyrmak», «Körpelerde daşary ýurt dillerini öwrenmäge höwes döretmekde we olaryň söz baýlygyny artdyrmakda dürli öwrediji oýunlardan peýdalanmagyň ähmiýeti», «Mekdebe çenli çagalar edaralarynda daşary ýurt dili sapaklaryny okatmakda integrirlenen usullar» we «Ролъ дидактических игр на уроках русского языка» diýen temalar boýunça çykyşlar diňlenildi. Çykyşlar mazmunlylygy bilen tapawutlanyp diňleýjiler üçin täze maglumatlary kabul etmäge, hünär bilimleri babatda täze usullar bilen tanyşmaga mümkinçilik berdi. Ähli çykyşlaryň esbaplar, foto görnüşler, deliller we nusgalar, şeýle-de elektron görkezme serişdeleri (prezentasiýalar) arkaly aýdyňlaşdyrylmagy degişli temalary maksadalaýyk özleşdirmekde täsirli boldy. Usuly-amaly maslahatyň gün tertibine laýyklykda geçirilen sapaklara seljermeler berildi, ýerine ýetirilen çykyşlar boýunça pikir alyşmalar guraldy.
Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan, Türkmenistanda sanly bilim ulgamyny ösdürmegiň Konsepsiýasyndan gelip çykýan wezipeleri durmuşa geçirmekde, daşary ýurt dillerini okatmagyň kämilleşdirmegiň pedagogik ýörelgelerini mundan beýläk hem netijeli dowam etmekde ähmiýetli bolan «Mekdebe çenli çagalar edaralarynda körpelere daşary ýurt dillerini öwretmegiň döwrebap usullary» atly welaýat derejesinde geçirilen usuly-amaly maslahat türkmen halkynyň Milli Lideri Gahryman Arkadagymyzyň, milli bilim ulgamyny halkara derejesinde ösdürmekde beýik işleri durmuşa geçirýän hormatly Prezidentimiz Arkadagly Gahryman Serdarymyzyň adyna ähli gatnaşyjylaryň alkyşlary bilen jemlendi.
Tawus ANNAMÄMMEDOWA,
Mary welaýat Baş bilim müdirliginiň mekdebe çenli bilim, terbiýe we mekdepden daşary çagalar edaralary bölüminiň baş hünärmeni.
