Biz mukaddes Watanymyzyň şanly Garaşsyzlygynyň 35 ýyllyk toýunyň ýylýazgysyna altyn harplar bilen ýazyljak, geljekki nesillerimiz üçin uly miras peşgeş boljak beýik tutumlaryň we ajaýyp wakalaryň ruhy dabaralanmasyna şaýat bolýarys. «Garaşsyz, baky Bitarap Türkmenistan — bedew batly at-myradyň mekany» ýylynyň bahar paslynyň täze galkynyşlara beslenen şu nurana günlerinde, hormatly Prezidentimiz Arkadagly Gahryman Serdarymyzyň ak pata bermegi bilen Mary welaýatynyň Ýolöten etrabynyň Ymambaba geňeşliginde täze, döwrebap şäherçäniň düýbüniň tutulmagy hem-de Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylmagy, döwletimiziň ykdysady kuwwatynyň we halkymyzyň bagtyýarlygynyň aýdyň nyşanyna öwrüldi.
Hawa, gurmak, döretmek we bina galdyrmak — taryhyň dowamynda halkymyzyň durmuşynyň we häsiýetiniň aýrylmaz bölegine öwrülen, ata-babalarymyzdan miras galan mukaddes ýoldur. Türkmen halky haýsy döwürde ýaşasa-da, guran binalary, galdyran şäherleri we döreden maddy-ruhy gymmatlyklary bilen dünýä medeniýetine uly goşant goşup gelýär. Bu gün şol asylly milli ýörelgeleriň Gahryman Arkadagymyzyň beýik başlangyçlary we Arkadagly Gahryman Serdarymyzyň yzygiderli tagallalary netijesinde täze belentliklere göterilýändigini şaýat bolýarys.
Munuň aýdyň subutnamasy hökmünde, «Garaşsyz, baky Bitarap Türkmenistan — bedew batly at-myradyň mekany» ýylynda, mukaddes Garaşsyzlygymyzyň şanly 35 ýyllyk toýuna uly zähmet sowgatlary bilen barýan günlerimizde, Arkadagly Gahryman Serdarymyzyň hut özüniň gatnaşmagynda Mary welaýatynyň Ýolöten etrabynyň Ymambaba geňeşliginde döwrebap şäherçäniň düýbüniň tutulmagyny görkezmek bolar. Bu taryhy waka diňe bir gurluşyk dabarasy bolman, eýsem, pederlerimizden gelýän «Abatlyk — bina bilen» diýen sarsmaz ýörelgämiziň häzirki döwrüň sanly ösüşleri bilen bitewi sazlaşygyny dabaralandyrýan täze eýýamyň nyşanydyr.
Hormatly Prezidentimiziň pähim-paýhasyndan kemal tapan bu beýik tutumlar, Mary topragynyň egsilmez bereketi we döwletimiziň bedew batly ösüşleri bilen bitewi sazlaşygy emele getirip, täze taryhy eýýamyň iň nurana sahypalaryny ýazýar. Bu ýerde guruljak her bir jaý, açyljak her bir durmuş maksatly desga ýurdumyzyň ýaşlary üçin diňe bir täze mümkinçilikleriň gapysyny açman, eýsem olaryň öňde goýan belent maksatlaryna we röwşen arzuwlaryna ýetmeklerinde mizemez binýat hem-de geljege gönükdirilen esasy çelgi bolar. Bu amala aşyryljak işler ýaş nesillerimizi täze taryhy ýeňişlere ruhlandyrmak bilen, olaryň bagtyýar durmuşynyň we döredijilikli zähmetiniň aýdyň kepiline öwrüler.
Kasymmyrat DURDYÝEW,
Ýagşygeldi Kakaýew adyndaky Halkara nebit we gaz uniwersitetiniň mugallymy.
.
