Ýurdumyzyň bilim ulgamyny has-da kämilleşdirmek, ýaş nesle berilýän bilimiň mazmunyny baýlaşdyrmak we mugallymlaryň hünär ussatlygyny höweslendirmek döwlet syýasatynyň ileri tutulýan ugurlarynyň biridir. «Garaşsyz, baky Bitarap Türkmenistan – bedew batly at-myradyň mekany» ýylynyň dabaralara beslenýän günlerinde orta mekdep müdirleriniň okuw-terbiýeçilik we terbiýeçilik işleri boýunça orunbasarlarynyň hem-de çagalar baglarynyň terbiýeçi-usulçylarynyň arasynda yglan edilen bäsleşigiň welaýat tapgyry uly gyzgalaň bilen geçirildi.
Bu bäsleşik diňe bir bäsleşik bolman, eýsem öňdebaryjy tejribeleri paýlaşmak we bilim ojaklaryndaky terbiýeçilik işleriniň täzeçil usullaryny ýüze çykarmak üçin giň mümkinçilik döretdi. Welaýat tapgyryna etrap we şäher tapgyrlarynda aýratyn ukyby we döredijilikli işi bilen tapawutlanyp, ýeňiji bolan hünärmenler gatnaşdy. Bäsleşigiň dowamynda gatnaşyjylaryň wezipe-borçlaryna düşünişi, iş resminamalarynyň ýöredilişi, mekdepde we çagalar baglarynda okuw-terbiýeçilik işiniň talabalaýyk ýola goýluşy eminler topary tarapyndan içgin öwrenildi.
Şeýle hem gatnaşyjylar amaly çykyşlaryň dowamynda Gahryman Arkadagymyzyň nusgalyk kitaplaryndaky milli terbiýeçilik ýörelgelerini düşündirmekde, akyldar şahyrymyz Magtymguly Pyragynyň öwüt-nesihat beriji goşgularyny labyzly okamakda we bilim-terbiýe işini kämilleşdirmek boýunça öz täzeçil tekliplerini hödürlemekde özleriniň hünär taýýarlygyny aýdyň görkezdiler.
Bäsleşigiň jemleýji pursatlary has-da täsirli boldy. Eminler toparynyň gelen netijesine görä, iň döredijilikli we ussat bilim işgärleri “Mekdep müdiriniň iň göreldeli okuw-terbiýeçilik işleri boýunça orunbasary”, “Mekdep müdiriniň iň göreldeli terbiýeçilik işleri boýunça orunbasary” hem-de “Iň göreldeli terbiýeçi-usulçy” diýen hormatly atlara mynasyp görüldiler. Ýeňijiler welaýatymyzyň bilim abraýyny goramak üçin bäsleşigiň döwlet tapgyryna gatnaşmaga hukuk gazandylar. Çäräniň ahyrynda gatnaşyjylar milli bilim ulgamynyň belentliklere galmagynda we terbiýeçi-mugallymlaryň döredijilikli zähmet çekmegi üçin ähli şertleri döredip berýän hormatly Prezidentimize we Gahryman Arkadagymyza çuňňur minnetdarlyklaryny bildirdiler.
Gunça SEÝITNIÝAZOWA,
Lebap welaýat Baș bilim müdirliginiň mekdebe çenli bilim, terbiýe bölüminiň baș hünärmeni.
