Türkmen bedewi halkymyzyň şanly geçmişiniň çeper beýanydyr. Uçmahy bedewlerimiziň waspy ata-babalarymyzyň asyrlaryň dowamynda taraşlap, dilden-dile, nesilden-nesle geçirip gelen nakyllarynda, aýtgylarynda, alkyş-dileglerinde giň orun tapypdyr. Pederlerimiziň «At — myrat», «Atda wepa-da bar, sapa-da», «At dosty — ata dosty», «Ataň barka, dost gazan, atyň barka ýol» diýen pähimleri bedewleriň halk hakydasynda mäkäm orun alandygyndan habar berýär.
Ahalteke atçylyk sungatynyň we atlary bezemek däpleriniň türkmen sungatynyň naýbaşy görnüşleriniň biri hökmünde ÝUNESKO-nyň Adamzadyň maddy däl medeni mirasynyň sanawyna girizilmegi milli we dünýä medeniýetiniň gymmatlygy hasaplanýan bedewlerimiziň Ýer ýüzündäki at-abraýyny has-da dabaralandyrdy. Şeýle hem Gahryman Arkadagymyzyň başlangyjy esasynda 2007-nji ýylda döredilen «Galkynyş» milli at üstündäki oýunlar toparynyň halkara ýaryşlarda gazanýan üstünlikleri halkymyzyň bedewlere goýýan sarpasyna, ýurdumyzda ahalteke atlaryny we gadymdan gelýän seýisçilik däplerini aýawly saklamak babatda uly işleriň durmuşa geçirilýändigine şaýatlyk edýär. Şoňa görä-de, bu şanly ýylda hem Türkmen bedewiniň milli baýramy mynasybetli ýaýbaňlandyrylan dabaralara aýratyn ruhubelentlik mahsus boldy.
Aşgabat atçylyk sport toplumynyň öňünde meşhur ahalteke bedewi Pyýadanyň heýkeliniň dabaraly ýagdaýda açylmagy ildeşlerimiz üçin ajaýyp toý sowgady bolmak bilen, halkymyzyň köpasyrlyk atşynaslyk mekdebine we milli mirasymyza goýulýan belent sarpanyň aýdyň nyşanyna öwrüldi. Çünki Pyýada atly bedew paýtagtymyz Aşgabat şäherinde 1998-nji, 1999-njy, 2000-nji we 2001-nji ýyllarda geçirilen ahalteke atlarynyň gözellik sergileriniň ýeňijisi, 2008-2009-njy ýyllarda Özbegistan Respublikasynyň Daşkent şäherinde ahalteke atlarynyň arasynda geçirilen «Türküstanyň ýyldyzy» atly gözellik bäsleşiginiň baş baýragyna mynasyp boldy. Häzirki wagtda ýazky at çapyşygy möwsüminde üçýaşar atlaryň arasynda 1 müň 800 metr aralyga geçirilýän çapyşyklaryň ýeňijilerine onuň adyny göterýän «Pyýada» baýragy gowşurylýar.
Gahryman Arkadagymyz «Atda wepa-da bar, sapa-da» atly kitabynda: «Ahalteke bedewleriniň dowamaty rowaç bolsun!» diýip belleýär. Bu günki gün bu sözler Arkadagly Gahryman Serdarymyzyň parasatly baştutanlygynda durmuş hakykatyna öwrülýär. Şundan ugur alsak, Türkmen bedewiniň milli baýramy mynasybetli ýaýbaňlandyrylan dabaralar halkymyzyň milli buýsanjyna öwrülen bedewleriň at-owazasyny dünýä ýaýýar.
Gülşat HAKYÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyby.
