Göz guwanýar, atyr burkly her künji,
Dünýäde birdir, meniň Watanym!
Änew, Nusaý, Merw hem Köneürgenji
Açylmadyk syrdyr, eziz Watanym!
Gollarynda — şirwan perde, gazmasy…
Dünýä meşhur dessançylyk nagmasy.
Ýazyna ýaraşyk bahar çagbasy,
Ylhamlansa sildir, eziz Watanym!
Watan goýny meňzäp jennet mysala
Pyragyň arzuwy döndi wysala
Arkadagyň yhlasyndan bu ýaýla
Mydam jebis ildir eziz Watanym!
Taryhda şöhratly gerçek begleri,
Oba-ili, hatar-hatar degreli.
Teke, ýomut, gökleň, ýazyr, alili
Köp şiweli dildir, eziz Watanym!
Bu topraga düşmüş — Hakyň nazary!
Daýhan yhlasyndan — boldur bazary!
Bol suwly kanaly, çeşme, güzeri…
Bagy-bossan güldür, eziz Watanym!
Gelin-gyzy gözel, goýar lerzana,
Ýigitleri ezber, merdi-merdana!
Myhmansöýer, gujak açar mydama,
Saçak ýazsa giňdir, meniň Watanym!
Nurmyrat AŞYROW,
Seýitnazar Seýdi adyndaky Türkmen döwlet mugallymçylyk institutynyň 2-nji ýyl talyby.
