Döwletiň we jemgyýetiň iň ýokary gymmatlygy bolan adamyň saglygy barada hemmetaraplaýyn alada etmek Berkarar döwletiň täze eýýamynyň Galkynyşy döwründe hormatly Prezidentimiziň paýhasly baştutanlygynda üns berilýän esasy ugurlaryň biridir. Ynsan saglygy we abadan durmuşy babatdaky giň möçberli işler halkymyzyň ýaşaýyş-durmuş şertlerini yzygiderli gowulandyrmak boýunça amala aşyrylýan maksat-tutumlar bilen sazlaşykda alnyp barylýar.
«Il saglygy — ýurt baýlygy» diýilýär. Döwletimiziň raýatlarynyň saglygy ýurdumyzyň baýlygyna deňelýär. Ata Watanymyzyň ösüşi we geljegi jemgyýetiň sagdynlygy bilen berk baglanyşyklydyr. Şonuň üçin hem halkyň saglygyny goramagy we sagdyn durmuş ýörelgelerini jemgyýete ornaşdyrmagy maksat edinýän özgertmeler, maksatnamalar durmuşa geçirilýär.
«Saglyk» Döwlet maksatnamasy ýurdumyzyň saglygy goraýyş we derman senagaty ulgamyny ösdürmek, ulgamyň işini hil taýdan dünýä ülňülerine laýyk getirmek babatdaky giň möçberli özgertmeleriň berk binýady bolup hyzmat edýär. Bu maksatnama laýyklykda, saglygy goraýyş ulgamynyň kanunçylyk esaslary has-da kämilleşdirilýär. Ulgamyň maddy-enjamlaýyn binýadyny yzygiderli pugtalandyrmak, bejeriş-öňüni alyş işleriniň netijeliligini ýokarlandyrmak, ilata edilýän lukmançylyk hyzmatlaryny döwrüň talaplarynyň derejesinde guramak boýunça durmuşa geçirilýän işler adam hakyndaky aladany özünde jemleýär.
Şunuň bilen baglylykda, ýokary derejeli hünärmenleri taýýarlamaga hem uly üns berilýär. Ýaşlaryň hünärleri ezber ele almaklary üçin möhüm şertler üpjün edilýär. Sanly ulgamyň giň mümkinçiliklerinden peýdalanýan, dünýä we milli tejribelerden ugur alýan hünärmenler bolsa ýurdumyzyň geljegi hem daýanjydyr.
Merjen HUDAÝKULYÝEWA,
Türkmenistanyň Içeri işler ministrliginiň institutynyň Dünýä dilleri kafedrasynyň rus dili mugallymy.
