Her ýylyň 7-nji aprelinde Türkmenistanda, tutuş halkara jemgyýetçilik bilen bilelikde, Bütindünýä saglyk güni giňden, dabaraly bellenilýär. Mukaddes Garaşsyzlygymyzyň şanly 35 ýyllyk toýy giňden baýram ediljek «Garaşsyz, baky Bitarap Türkmenistan — bedew batly at-myradyň mekany» ýylynda bu sene mynasybetli geçirilýän dürli çäreler ýylyň şygaryna, döredijilik ruhuna muwapyk röwüşde many-mazmun taýdan has-da baýlaşdyrylýar.
Türkmenistanyň Konstitusiýasynda adamyň jemgyýetiň we döwletiň iň ýokary gymmatlygy diýlip yglan edilmegi döwlet syýasatynyň ileri tutulýan ugruny kesgitleýär. Gahryman Arkadagymyzyň başyny başlan we häzirki wagtda Arkadagly Gahryman Serdarymyzyň parasatly baştutanlygynda üstünlikli durmuşa geçirilýän bu syýasat adamyň abadan durmuşyny üpjün etmäge gönükdirilendir. Şunda eziz Watanymyzda köpçülikleýin bedenterbiýe-sagaldyş we sport hereketiniň giň gerime eýe bolmagy, saglygy goraýyş ulgamynda gazanylýan taryhy üstünlikler sagdyn nesilleri terbiýelemekde möhüm orun tutýar. Bu uly tutumly işler halkymyzyň ýaşaýyş-durmuş derejesiniň yzygiderli ýokarlanmagyna hem-de Türkmenistan döwletimiziň halkara giňişlikdäki abraýynyň belende galmagyna ýardam edýär.
Häzirki wagtda eziz Diýarymyzyň ähli künjeklerinde döwrebap sport toplumlary we saglygy goraýyş desgalary gurlup ulanmaga berilýär. Şunda ylym-bilim edaralarynyň hem-de ýaşaýyş toplumlarynyň taslamalary işlenip taýýarlananda we gurluşyk işleri alnyp barlanda sport düzüminiň göz öňünde tutulmagy hökmany talap bolup durýar. Munuň özi ýaş nesliň sazlaşykly kemala gelmegini üpjün etmek ugrunda ägirt uly jogapkärçiligiň we geljegiň bähbidine alnyp barylýan işleriň aýdyň güwäsidir.
Gahryman Arkadagymyzyň belleýşi ýaly, saglyk bagtyýarlygyň gözbaşydyr, ol ömrüň gymmatyny kesgitleýän bahasyz baýlykdyr. Saglygyň sag adamyň başyndaky altyn täje deňelmegi-de hut şu manyny özünde jemleýär. Goý, öz ykbalynda hemişe şol «altyn täje» buýsanyp, ömrüň gymmatyny duýup ýaşamak her bir adama nesip etsin!
Enejan GURBANOWA,
TDP-niň Hojambaz etrap komitetiniň partiýa guramaçysy.
