Telekeçilik işiniň döwlet tarapyndan yzygiderli goldanylmagy milli ykdysadyýetimiziň diwersifikasiýa ýoly bilen ösdürilmeginde we ýurdumyzyň eksport kuwwatynyň artdyrylmagynda strategik ähmiýete eýedir. Häzirki wagtda hususy pudagyň wekilleri täzeçil tehnologiýalary önümçilige ornaşdyrmak, ýokary hilli, bäsdeşlige ukyply harytlary öndürmek we döwrebap hyzmatlar ulgamyny kemala getirmek arkaly ýurdumyzyň durmuş-ykdysady taýdan ösüşine saldamly goşant goşýarlar.
Bazar gatnaşyklarynyň barha kämilleşmegi, hususy eýeçiligiň goraglylygynyň kanunçylyk taýdan berkidilmegi hem-de telekeçiler üçin döredilýän ýeňillikli maliýe we salgyt şertleri işewürlik gurşawynyň özüne çekijiligini has-da ýokarlandyrýar. Esasan hem, oba hojalygynda azyk bolçulygyny döretmek, gurluşyk serişdeleriniň önümçiligini döwrebaplaşdyrmak we hyzmatlar ulgamynda sanly çözgütleri ulanmak ýaly ugurlarda hususyýetçileriň alyp barýan işleri importyň ornuny tutýan önümçilikleriň gerimini giňeltmäge mümkinçilik berýär.
Türkmenistanda bazar gatnaşyklaryny ösdürmegiň, kiçi we orta telekeçilige goldaw bermegiň hukuk esaslary yzygiderli kämilleşdirilýär. Esasy Kanunymyzyň 134-nji maddasynda bellenilişi ýaly, Türkmenistanyň ykdysadyýeti bazar gatnaşyklary ýörelgelerine esaslanýar. Döwlet telekeçiligi höweslendirýär we goldaýar, kiçi hem-de orta işewürligiň ösmegine ýardam edýär. Munuň üçin dürli ýyllarda «Türkmenistanyň Senagatçylar we telekeçiler birleşmesi hakynda», «Telekeçilik işi hakynda», «Kiçi we orta telekeçiligi goldamak hakynda», «Döwlet-hususy hyzmatdaşlygy hakynda» Türkmenistanyň Kanunlary kabul edildi.
Döwlet-hususy hyzmatdaşlygynyň täze derejä çykmagy netijesinde, iri göwrümli taslamalary durmuşa geçirmäge telekeçileriň işjeň çekilmegi bolsa ýurdumyzyň senagatlaşma derejesiniň ýokarlanmagyna we müňlerçe täze iş orunlarynyň döredilmegine şert döredýär. Şeýlelikde, telekeçilik başlangyçlarynyň höweslendirilmegi diňe bir ykdysady bähbitleri üpjün etmekle çäklenmän, eýsem raýatlaryň girdejileriniň artmagyna, olaryň döredijilikli zähmet çekmegine we halkymyzyň ýaşaýyş-durmuş derejesiniň barha gowulanmagyna hyzmat edýän kuwwatly güýje öwrülýär.
Merdan NOWRUZOW,
Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň talyby.
