Türkmen-hytaý gatnaşyklary öz gözbaşyny müňýyllyklardan alyp gaýdýar. Halklarymyzyň arasynda Beýik Ýüpek ýoly arkaly asyrlarboýy ösdürilen söwda-ykdysady we medeni gatnaşyklar dünýä siwilizasiýasynyň ösüşine, adamzat ýaşaýşynyň özgermegine özboluşly goşant goşupdyr. Şoňa görä-de, düýn paýtagtymyzyň Söwda-senagat edarasynda Türkmen-hytaý işewürler forumynyň we sergisiniň öz işine başlamagy möhüm ähmiýete eýedir.
Türkmen-hytaý işewürler forumy we sergisi dostlukly ýurduň senagat hem-de eksport kuwwaty bilen tanyşdyrmak, özara bähbitli hyzmatdaşlygyň geljegi uly täze ugurlaryny ösdürmek üçin netijeli meýdança bolup hyzmat edýär. Iri möçberli çäre dostlukly döwletiň işewür toparlarynyň 200-den gowrak wekilini türkmen paýtagtyna jemledi. Olaryň arasynda ýurdumyz bilen öňden bäri işleşip gelýän, harytlary alyjylara giňden belli bolan hyzmatdaşlar-da, şeýle hem işjeň gatnaşyklary ýola goýup, geljegi uly türkmen bazarynda orun almagy maksat edinýän işewürler hem bar.
Serginiň giň meýdançasynda gurnalan 70-den gowrak diwarlykda Hytaýyň köpugurly döredijilik hem-de innowasion mümkinçilikleri giňişleýin tanyşdyrylýar. Ýurdumyzda milli ykdysadyýetiň ähli ulgamlaryna öňdebaryjy tejribäni we häzirki zaman tehnologiýalaryny ornaşdyrmak döwlet syýasatynyň ileri tutulýan ugurlarynyň biri hökmünde kesgitlenendir. Şunda önümleri öndürmegiň we eksport etmegiň möçberi boýunça dünýäde öňdeligi eýeleýän dostlukly döwletiň gazananlarynyň ýurdumyzda uly gyzyklanma eýedigini bellemek gerek. Ägirt uly çig mal mümkinçiliklerine eýe bolan ýurdumyzyň alyp barýan “Açyk gapylar” syýasaty gyzyklanma bildirýän ähli taraplar bilen deňhukukly we özara bähbitli hyzmatdaşlygy ösdürmegi maksat edinýär.
Serginiň çäklerinde ýurdumyzyň ýangyç-energetika, söwda, maliýe we ykdysadyýet, oba hojalyk, gurluşyk, ulag-aragatnaşyk toplumlarynyň, ugurdaş ministrlikleriň hem-de pudaklaýyn dolandyryş edaralarynyň ýolbaşçylarynyň iri hytaý kompaniýalarynyň wekilleri bilen ikitaraplaýyn duşuşyklary geçirildi. Duşuşyklarda taraplar gyzyklanma bildirilýän ugurlarda netijeli hyzmatdaşlygy hemmetaraplaýyn esasda ösdürmäge ygrarlydyklaryny tassykladylar.
Züleýha GAÝGYSYZOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby.
