Şu ýyl Türkmenistanyň ilkinji milli aragatnaşyk hemrasy bolan «TürkmenÄlem52°E» hemrasynyň älem giňişligine çykarylandygyna 11 ýyl dolýar. Bu döwür diňe bir döwlet mertebesiniň nyşany däl, eýsem, sebitde iň iri media-merkeze öwrülendiginiň subutnamasydyr.
2015-nji ýylyň aprelinde orbitada öz ornuny alan «TürkmenÄlem52°E» hemrasy, strategik taýdan amatly ýerleşişi netijesinde Ýewropanyň, Aziýanyň we Afrikanyň onlarça döwletini öz içine alýan ägirt uly meýdany ýokary hilli aragatnaşyk bilen üpjün edýär.
Şu günki günde milli hemramyz arkaly ýüzlerçe halkara tele we radio ýaýlymlary yzygiderli ýaýlyma berilýär. Bu bolsa Türkmenistanyň dünýäde maglumat hyzmatlarynyň bazarynda esasy orunlaryň birini eýeleýändigini görkezýär. Dünýä dilleriniň ondan gowragynda gepleýän halkara teleýaýlymlaryň medeni alşygyň we halkara dostluk gatnaşyklarynyň berkemegine hyzmat edýär.
11 ýylyň dowamynda hemranyň bökdençsiz işlemegi aşakdaky möhüm wezipeleriň amala aşyrylmagyna şert döretdi:
• Milli teleradioýaýlymlaryň dünýä derejesinde özbaşdak ýaýradylmagy üpjün edildi.
• Ýurdumyzyň iň alys künjeklerinde hem ýokary hilli sanly telewideniýe we ýokary tizlikli hemra interneti elýeterli boldy.
• «Türkmen hemrasy» ýapyk görnüşli paýdarlar jemgyýeti tarapyndan VSAT aragatnaşyk hyzmatlary arkaly nebit-gaz, energetika, senagat we ulag ulgamlarynyň işi kämilleşdirildi.
Milli hemramyzyň tehniki mümkinçilikleri dünýäniň iri teleradio kompaniýalaryny özüne çekýär. Häzirki wagtda «Älem TV» ýaly iri taslamalaryň çäklerinde dünýäniň iň meşhur täzelikler, sport, dynç alyş we bilim beriji telekanallary HD formatynda tomaşaçylara ýetirilýär. «TürkmenÄlem52°E» hemrasynyň orbitadaky 11 ýyllyk şanly ýoly Türkmenistanyň geljekde hem täze hemra taslamalaryny durmuşa geçirmäge doly taýýardygyny görkezýär. Bu döwürde ýurdumyzda hemra ulgamlaryny dolandyrýan ýokary hünärli ýaş hünärmenleriň täze nesli kemala geldi.
«THE ASHGABAT TIMES».
