Bagtyýar nesillerimiziň milli ruhda terbiýelenmegi, olaryň döredijilik başarnyklarynyň kämilleşdirilmegi, sungat garaýyşlarynyň çuňlaşdyrylmagy, terbiýeçilik taýdan guralýan işleriň netijeliliginiň artdyrylmagy ugrundaky işler hemişe üns merkezinde saklanýar. Biziň çagalar bakja-bagymyzda hem çagalaryň çeper we döredijilik çykyşlarynyň mazmunlylygyny gazanmaga, çagalaryň ukyp-başarnyklarynyň we zehinleriniň ýüze çykarylmagyna gönükdirilen guramaçylyk, usulyýet işler maksadalaýyk amala aşyrylýar.
«Garaşsyz, baky Bitarap Türkmenistan ― bedew batly at-myradyň mekany» ýylymyzda hem bu ugurda ýerine ýerine ýetirilýän işler özüniň oňyn netijelerini görkezýär. Muňa mysal edip, ýaňy-ýakynda «Nowruz nagmalary» atly körpeleriň halk döredijilik toparynyň çykyşlary boýunça bäsleşikde biziň çagalar bakja-bagymyzda terbiýelenýän körpeleriň topary Mary welaýaty boýunça geçirilen tapgyrda hem Baş baýraga mynasyp boldular. Bu üstünlik biziň her birimizi, şol sanda ata-eneleri hem tüýs ýürekden begendirdi.
Ýeri gelende bellesek, milli lybasly çagalar bezelen sahnada terbiýeçilik ähmiýetli milli oýunlary, däp-dessurlardan, halk döredijiliginden parçalary degişli şertler boýunça ýerine ýetirdiler. Çagalaryň bu ugurdaky çykyşlaryny taýýarlamakda terbiýeçi Maýsa Abdyýewa hem-de Gülbahar Çerkezowanyň ussatlarça taýýarlygyna uly orun degişlidir. Sebäbi sazlaşykly guralýan işler çagalaryň üstünligine täsir edýär. Şoňa görä-de, şowly çykyşlardan ruhlanyp, mundan beýläk hem has netijeli we yhlasly zähmet çekmäge çalyşýarys.
Mundan başga-da, biziň körpelerimiz şanly Garaşsyzlygymyzyň 35 ýyllygynyň baýram edilýän ýylynda dürli bäsleşiklere we çärelere hem uly ruhubelentlik bilen taýýarlyk görýärler. Sebäbi döwrümiziň ösüşlerine goşant goşmak biziň üçin uly buýsanç. Mundan beýläk hem yhlasly we netijeli işlemek, hünärleri kämilleşdirmek babatda uly mümkinçilikleri döredip berýän Milli Liderimize hem-de hormatly Prezidentimize ähli bilim-terbiýeçilik işgärleriniň, körpe nesilleriň we ata-eneleriň köňül alkyşlary egsilmezdir.
Gülşat ORAZOWA,
Mary şäheriniň rus dilini çuňlaşdyryp öwredýän ýöriteleşdirilen 21-nji çagalar bakja-bagynyň müdiriniň wezipesini wagtlaýyn ýerine ýetiriji.
