Russiýa Federasiýasynyň Hökümetiniň Başlygy Mihail Mişustin GDA-nyň Hökümet Baştutanlarynyň Geňeşiniň mejlisine gatnaşmak maksady bilen Aşgabada geldi. Russiýanyň Premýer-ministrini paýtagtymyzyň halkara howa menzilinde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow we Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Wolynkin garşyladylar. Bu barada RF-niň Hökümetiniň resmi saýty habar berýär.
Saparyň çäklerinde Mihail Mişustin Türkmenistanyň Prezidenti Serdar Berdimuhamedow bilen duşuşdy. Geçirilen ýokary derejeli gepleşikleriň barşynda taraplar iki ýurduň arasyndaky ikitaraplaýyn hyzmatdaşlygyň esasy ugurlary barada giňişleýin pikir alyşdylar. Söhbetdeşligiň dowamynda senagat, energetika we logistika ulgamlaryna aýratyn üns berildi.
Şunuň bilen baglylykda, Hytaýyň, Hindistanyň, Pars aýlagy ýurtlarynyň, Aziýa-Ýuwaş umman sebitiniň we Afrikanyň bazarlaryna çykmaga giň şertleri döredýän hem-de täze söwda mümkinçiliklerini açýan «Demirgazyk — Günorta» halkara ulag geçelgesiniň uly ähmiýete eýedigi aýratyn bellenildi.
Hökümet Baştutany Mihail Mişustin geçirilen netijeli duşuşygyň jemleri boýunça beren beýanatynda: «Biziň saparymyzyň diňe bir söwda-ykdysady däl, eýsem, dostlukly halklarymyzy özara baglanyşdyrýan medeni-gumanitar gatnaşyklarymyzyň has-da ösmegine täze itergi berjekdigine umyt edýärin» diýip, aýratyn nygtady.
