Häzirki zaman bilim ulgamynda daşary ýurt dillerini, aýratyn-da, iňlis dilini öwretmek meselesi täzeçe çemeleşmeleri we usulyýet kämilleşdirilmelerini talap edýär. Mugallymçylyk orta hünär okuw mekdepleriniň iňlis dili mugallymynyň öňünde duran esasy wezipe diňe bir talyplara diliň grammatik düzümini ýa-da söz baýlygyny öwretmek bilen çäklenmän, eýsem, geljekki pedagoglaryň bu dili öz iş amalyýetlerinde erkin ulanyp bilmeklerini gazanmakdan ybaratdyr.
Bilim we professional ösüş üçin iňlis dili iň uly açardyr. Dünýäniň iň abraýly uniwersitetleriniň okuw maksatnamalary, iň täze ylmy gözlegler we tehnologiki maglumatlaryň aglabasy iňlis dilinde çap edilýär. Halkara derejeli kärhanalarda işlemek, dünýä bazaryna çykmak we öz ugruň boýunça dünýä derejeli hünärmen bolmak isleýän her bir ýaş ynsan üçin bu dili bilmek geljegiň ygtybarly binýadydyr.
Tehnologiýanyň we internetiň dili hem hut iňlis dilidir. Häzirki wagtda internetdäki maglumatlaryň ýarysyndan gowragy şu dilde ýerleşdirilendir. Programmirleme dilleri, emeli aň tehnologiýalary we sanly dünýäniň täzelikleri, ilki bilen, iňlis dilinde jemlenýär. Şol sebäpli, maglumaty çeşmesinden we gyzgyny bilen öwrenmek isleýän adam üçin iňlis dili elýeterliligiň ýeke-täk ýoludyr.
Medeniýet we syýahatçylyk babatda-da bu diliň ähmiýeti çäksizdir. Dünýäniň haýsy künjegine barsaňyz hem, iňlis dili arkaly dürli medeniýetleriň wekilleri bilen düşünişip, täze dostlar edinip bolýar. Şeýle-de dünýä edebiýatynyň nusgawy eserlerini, meşhur kinofilmleri we ylmy hasabatlary asyl nusgasynda okamak we diňlemek ynsanyň ruhy dünýäsini hem-de dünýägaraýşyny baýlaşdyrýar.
Jemläp aýtsak, iňlis dilini özleşdirmek diňe bir dil öwrenmek däl-de, eýsem, global jemgyýetiň işjeň agzasyna öwrülmekdir. «Dil bilen — dünýäni biler» diýlişi ýaly, bu diliň berýän mümkinçiliklerinden peýdalanmak ýaş hünärmenleriň we talyplaryň durmuşynda täze täze belentliklere ýol açýar.
Jemal NURMUHAMMEDOWA,
Berdimuhamet Annaýew adyndaky Arkadag şäher mugallymçylyk orta hünär okuw mekdebiniň iňlis dili mugallymy.
