«Garaşsyz, baky Bitarap Türkmenistan — bedew batly at-myradyň mekany» şygary astynda geçýän ýylda ata Watanymyz parahatçylyk söýüjilik, hoşniýetli goňşuçylyk hem-de sebitleýin we ählumumy derejede deňhukukly hyzmatdaşlyk ýörelgelerine esaslanýan daşary syýasat ugruna üýtgewsiz ygrarlydygyny anyk işler arkaly tassyklaýar. Gahryman Arkadagymyz tarapyndan başy başlanan we häzirki wagtda hormatly Prezidentimiz Serdar Berdimuhamedow tarapyndan üstünlikli dowam etdirilýän öňdengörüjilikli strategiýa laýyklykda, Türkmenistan gyzyklanma bildirýän ähli döwletler bilen netijeli gatnaşyklary ösdürmegi maksat edinýär. Bu ugur ýurdumyzyň halkara giňişlikdäki işjeň we döredijilikli ornunyň tebigy dowamy bolup çykyş edýär.
Garaşsyzlyk ýyllarynda Türkmenistan halkara giňişlikde Bitaraplyk syýasaty arkaly parahatçylygyň ygtybarly goldawçysy hökmünde tanaldy. Bitaraplyk – bu diňe bir syýasy ýol bolman, eýsem halkymyzyň dost-doganlyga, özara hormata we ynsanperwerlige esaslanýan ýaşaýyş ýörelgesidir. Şeýle ýörelgeler häzirki döwrüň talaplaryna laýyklykda ösdürilip, ýurdumyzda ykdysady, medeni we ylmy ugurlarda giň gerimli üstünlikler gazanylýar.
“Garaşsyz, baky Bitarap Türkmenistan – bedew batly at-myradyň mekany” ýylynyň çäklerinde alnyp barylýan işler hem halkymyzyň abadançylygyny ýokarlandyrmaga gönükdirilendir. Täze desgalaryň gurulmagy, döwrebap tehnologiýalaryň ornaşdyrylmagy, ýaş nesliň bilimli we giň dünýägaraýyşly bolup ýetişmegi ugrunda edilýän tagallalar munuň aýdyň mysalydyr. Bu bolsa Garaşsyz Watanymyzyň ösüş ýolunda ynamly öňe barýandygyny görkezýär.
2026-njy ýyl ýurdumyzyň Garaşsyzlygynyň 35 ýyllygyna beslenip, Berkarar döwletiň täze eýýamynyň Galkynyşy döwründe möhüm wakalara baý bolar. Bu wakalar Türkmenistanyň halkara giňişlikdäki ornuny has-da pugtalandyrar, sebitde we ählumumy hyzmatdaşlygy ösdürmäge, parahatçylygy, howpsuzlygy we durnukly ösüşi üpjün etmek boýunça tagallalary birleşdirmäge uly goşant goşar.
Begnazar GADAMOW
Ýagşygeldi Kakaýew adyndaky
Halkara nebit we gaz uniwersitetiniň öwreniji-mugallymy
