Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň hem-de hormatly Prezidentimiziň tagallalary netijesinde halkymyzyň asyrlar aşyp gelen milli ýol-ýörelgeleri, däp-dessurlary täze öwüşginlere eýe bolýar. Şunuň bilen baglylykda, Garaşsyz, hemişelik Bitarap Türkmenistan döwletimizde päkligiň, agzybirligiň, ynsanperwerligiň we jebisligiň toýy hökmünde aýratyn ähmiýete eýe bolan mukaddes Gurban baýramy uly şatlyk-şowhun bilen bellenildi.
Halkymyzda Gurban baýramy Beýik Biribara söýginiň, myhmansöýerligiň, hödür-keremiň, birek-birege hormat goýmagyň mizemez dessurlary bilen sazlaşyp, nesilden-nesle geçip gelýär. Hormatly Prezidentimiziň Gurban baýramyny bellemek hakynda gol çeken Permanyna laýyklykda, ildeşlerimiz bu mübärek baýram günlerinde gadymdan gelýän milli däp-dessurlarymyzy berjaý edip, gurbanlyk sadakalaryny bererler. Baýram günlerinde bereketli desterhanlar ýazylyp, agzybirligi, halallygy, raýdaşlygy ündew edýän söhbetler, ýagşy doga-dilegler ediler.
Mälim bolşy ýaly, hormatly Prezidentimiziň Buýrugyna laýyklykda, şu sahawatly günlerde ildeşlerimiziň uly topary haj parzyny berjaý etmek üçin Saud Arabystany Patyşalygyna iberildi. Şunuň bilen baglylykda, keramatly Mekge-Medinä haj zyýaratyny amala aşyrýan watandaşlarymyz hajy Arkadagymyzyň hem-de Arkadagly hajy Serdarymyzyň beýik işleriniň rowaç bolmagyny, halkymyzyň we tutuş adamzadyň parahat ýaşaýşyny dileg edip, toý sadakasyny berýärler.
Gurban baýramy günlerinde amal eden tagat-ybadatlaryňyz, beren sadakalaryňyz, okan aýat-töwirleriňiz, Garaşsyz Watanymyzyň abadançylygynyň, adamzadyň asuda we parahat durmuşynyň hatyrasyna eden doga-dilegleriňiz keremli Allatagalanyň dergähinde kabul bolsun, eziz ildeşler! Milli däp-dessurlarymyzyň, gadymy ýol-ýörelgelerimiziň has-da rowaçlanmagyna giň ýol açýan türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, döwletli işleri rowaç bolsun!
Allanur ORAZNEPESOW,
Türkmenistanyň Içeri işler ministrliginiň institutynyň ýanyndaky Okuw merkeziniň Okuw bölüminiň mugallymy, polisiýanyň leytenanty.
