Ata Watanymyzda 1941 — 1945-nji ýyllaryň Beýik Watançylyk urşunda gazanylan Ýeňşiň 81 ýyllygy bellenilýär. Ýurdumyzda bu urşa gatnaşan weteranlara, söweşde wepat bolan esgerleriň ýanýoldaşlaryna, tylda zähmet çekenlere uly sarpa goýulýar. Halk gahrymanlary döwletimiz tarapyndan hemmetaraplaýyn üns-alada bilen gurşaldy. Weteranlaryň saglygy, olaryň ýaşaýyş-durmuş derejesiniň gowulandyrylmagy bilen bagly meseleler döwletimiziň hemişelik üns merkezinde saklanýar.
Mälim bolşy ýaly, 2020-nji ýylda Beýik Watançylyk urşunda gazanylan Ýeňşiň 75 ýyllygy mynasybetli dabaralaryň guralýan pursatlarynda 2-nji ukrain frontunyň 206-njy atyjylyk diwiziýasynyň 748-nji atyjylyk polkunyň söweşjeň baýdagy Russiýadan Türkmenistana getirildi. Şol baýdagyň astynda edermen we gaýduwsyz esger Berdimuhamet Annaýew söweşipdir. Şunuň bilen baglylykda, Watan ugrundaky söweşde görkezen şahsy edermenligi, batyrlygy, gaýduwsyzlygy, Beýik Watançylyk urşy ýyllarynda harby borjuny birkemsiz ýerine ýetirendigi üçin Berdimuhamet Annaýewe Russiýa Federasiýasynyň ýokary döwlet sylagy — «Edermenligi üçin» medaly berildi.
Ýeri gelende bellesek, türkmen halkynyň milli gymmatlygy we buýsanjy bolan ahalteke bedewleri köp asyrlaryň dowamynda gaýduwsyz türkmen ýigitleriniň wepaly dostlaryna, ýakyn hemralaryna öwrülip, Ikinji jahan urşy ýyllarynda 97-nji we 98-nji türkmen atly diwiziýalary döredildi. Olaryň esgerleri iň bir gazaply söweşlere gatnaşyp, gahrymançylygyň beýik nusgasyny görkezdiler. Watandaşlarymyzyň müňlerçesiniň orden-medallar bilen sylaglanandygyny hem buýsançly ýatlamak gerek. Türkmenistanly esgerleriň ýüzden gowragy bolsa «Gahryman» diýen belent derejä mynasyp boldular
Her bir güni buýsançly wakalara beslenýän «Garaşsyz, baky Bitarap Türkmenistan — bedew batly at-myradyň mekany» ýylynda hem paýtagtymyzda, welaýat we etrap merkezlerinde 1941 — 1945-nji ýyllaryň Beýik Watançylyk urşunda gazanylan Ýeňşiň 81 ýyllygy mynasybetli baýramçylyk çäreleri ýaýbaňlandyrylýar. Aşgabat şäherindäki «Halk hakydasy» ýadygärlikler toplumyna, ähli şäherlerimizdir obalarymyzda milli hakydamyza öwrülen ýadygärliklere ter gül desseleri goýulýar. Ýeňiş güni mynasybetli aýdym-sazly medeni-jemgyýetçilik çäreleri geçirilýär, uruş weteranlaryna baýramçylyk sowgatlary gowşurylýar. Munuň özi milli gahrymanlarymyza goýulýan çäksiz sarpanyň aýdyň güwäsidir.
Sapardurdy JUMADURDYÝEW,
TGÝMJ-niň Daşoguz welaýat bölüminiň Garaşsyzlyk etrap wekili.
