Garaşsyz, hemişelik Bitarap Türkmenistan döwletimizde her bir şanly sene halkymyzyň taryhy buýsanjyny, milli agzybirligini we döwletlilige bolan belent hormatyny dabaralandyrýar. Şeýle ajaýyp baýramlaryň biri hem her ýylyň 18-nji maýynda bellenilýän Türkmenistanyň Konstitusiýasynyň we Türkmenistanyň Döwlet baýdagynyň günüdir. Bu şanly sene milli döwletliligimiziň iki beýik nyşanyny — Esasy Kanunymyzy hem-de ýaşyl tugumyzy bitewi bir many-mazmunda birleşdirýär.
Ýurdumyzda her ýylyň 18-nji maýynda giňden bellenip geçilýän Türkmenistanyň Konstitusiýasynyň we Türkmenistanyň Döwlet baýdagynyň güni Garaşsyz döwletine, özygtyýarly ösüş ýoluna eýe bolan türkmen halkynyň çäksiz buýsanjyny ýüze çykarýar. Häzirki wagtda bu döwlet nyşanlarymyz agzybirligimizi we bitewüligimizi alamatlandyryp, demokratik, hukuk, dünýewi döwlet, adalatly raýat jemgyýeti baradaky milli düşünjelerimizi özünde jemleýär.
Bilşimiz ýaly, 1992-nji ýylyň 18-nji maýynda Türkmenistanyň Konstitusiýasynyň kabul edilmegi türkmen halkynyň iň täze taryhynda möhüm waka boldy. Konstitusiýa ýurdumyzyň hukuk binýady, jemgyýetçilik durmuşynyň berk daýanjy we demokratik ösüşleriň ýol görkeziji resminamasy bolup, ol halkymyzyň asyrlaryň dowamynda kemala getiren adalatlylyk, ynsanperwerlik we agzybirlik ýaly asylly ýörelgelerini özünde jemleýär. Esasy Kanunymyzda: «Türkmenistanda jemgyýetiň we döwletiň iň ýokary gymmatlygy adamdyr» diýilýär. Munuň özi «Döwlet adam üçindir!», «Watan diňe halky bilen Watandyr! Döwlet diňe halky bilen döwletdir!» diýen baş şygarlar bilen özboluşly sazlaşygy emele getirýär.
Berkarar döwletiň täze eýýamynyň Galkynyşy döwründe Döwlet baýdagymyz jebisligimiziň, parahatçylyk söýüjilik, dostluk, hoşniýetli goňşuçylyk däplerimiziň mukaddes nyşany hökmünde belentde parlaýar. Baýdagymyzyň ýaşyl reňki parahatçylygy, abadançylygy we ýaşaýşy alamatlandyryp, ondaky bäş sany haly göli ýurdumyzyň bäş welaýatynyň agzybirligini, zeýtun şahalary bolsa Birleşen Milletler Guramasynyň Baş Assambleýasy tarapyndan ykrar edilen Türkmenistanyň hemişelik Bitaraplyk hukuk ýagdaýyny aňladýar.
Türkmenistanyň Konstitusiýasynyň we Türkmenistanyň Döwlet baýdagynyň güni her birimiziň ýüregimizde döwletlilige bolan hormaty, Watana bolan söýgini we raýatlyk jogapkärçiligini has-da pugtalandyrýar. Bu mukaddesliklere wepaly bolup, Konstitusiýamyzyň kadalaryny gyşarnyksyz berjaý etmek we ýaşyl tugumyzyň abraýyny has-da belende götermek her bir türkmen raýatynyň mukaddes borjudyr.
Kamila MARAWAÝEWA,
Türkmenistanyň Içeri işler ministrliginiň institutynyň Dünýä dilleri kafedrasynyň iňlis dili mugallymy.
