Matematikany okatmagyň usulyýeti pedagogika ylmynyň aýrylmaz bölegi bolup, ol ösüp gelýän ýaş nesle berilýän bilimiň mazmunyny, usullaryny we guramaçylyk şertlerini ylmy esasda kämilleşdirmäge gönükdirilendir. Bu dersiň öňünde duran esasy wezipeleriň biri okuwçylara diňe bir sanlar we amallar baradaky bilimleri bermek däl, eýsem olarda logiki pikirlenmegi, analitiki ukyplary we giňişlik baradaky düşünjeleri kemala getirmekden ybaratdyr.
Häzirki zaman bilim ulgamynda matematikany okatmagyň usulyýeti okuw maksatnamalaryny döwrebaplaşdyrmak, dersara baglanyşygy üpjün etmek we sanly tehnologiýalary okuw işine netijeli ornaşdyrmak ýaly möhüm meseleleri çözýär. Usulyýetiň amaly wezipeleriniň hatarynda okuw materiallarynyň elýeterliligini üpjün etmek we her bir ýaş aýratynlygyna laýyk gelýän iň amatly okatmak tärlerini saýlap almak durýar. Bu ugurda mugallym diňe bir maglumat beriji bolman, eýsem okuwçynyň özbaşdak çözgüt tapmak ukybyny ösdürýän ugrukduryjy hökmünde çykyş edýär.
Matematika dersiniň üsti bilen okuwçylaryň takyklyga, tertibe we yzygiderli zähmete bolan höwesini artdyrmak hem usulyýetiň terbiýeçilik wezipelerine degişlidir. Şeýle hem nazary bilimleri durmuşda duş gelýän amaly meseleler bilen utgaşdyrmak, mesele çözmegiň dürli ýollaryny gözlemek we iň amatlysyny saýlamagy öwretmek bu ylmyň esasy maksatlarynyň biridir. Munuň bilen birlikde, matematikany okatmagyň usulyýeti yzygiderli kämilleşýän we täze ylmy açyşlara esaslanýan dinamiki maddy-enjamlaýyn binýady talap edýär.
Okatmagyň interaktiw usullaryny ulanmak, algoritmleri dogry düzmegi öwretmek we okuwçylaryň döredijilikli pikirlenmesini goldamak häzirki döwrüň talaplaryna doly laýyk gelýär. Netijede, usulyýetiň dogry alnyp barylmagy jemgyýet üçin zerur bolan ýokary derejeli hünärmenleriň kemala gelmegine we ylym-bilim ulgamynyň umumy ösüşine saldamly goşant goşýar. Ýurdumyzda ýaş nesilleriň döwrebap ylym-bilim alyp, kämil ynsanlar bolup ýetişmekleri ugrunda taýsyz tagallalar edýän Milli Liderimiziň hem-de hormatly Prezidentimiziň janlary sag, ömürleri uzak bolsun!
Allamyrat MÄMMEDOW,
Mary etrabynyň Çary Gurbangylyjow adyndaky 19-njy orta mekdebiniň okuw işleri boýunça orunbasary.
