Matematika biliminiň mazmunynyň döwrebaplaşdyrylmagy bu dersi okatmagyň usulyýetiniň öňünde täze wezipeleri goýýar. Matematikany okatmagyň usulyýeti diňe bir bilim bermek däl, eýsem, okuwçylaryň logiki pikirlenmesini ösdürmek we olarda ylmy dünýägaraýşy kemala getirmek bilen gönüden-göni baglanyşyklydyr. Bu dersiň okadylyşynda öňde durýan esasy wezipeleriň biri okuwçylara matematiki bilimleriň ulgamyny çuňňur we yzygiderli öwretmekden ybaratdyr. Şunda nazary bilimleriň amalyýet bilen utgaşmagy meseleleri çözmegiň dürli usullarynyň ele alynmagy esasy şert bolup durýar.
Usulyýet nukdaýnazaryndan seredilende, matematikany okatmagyň terbiýeçilik we ösdürijilik wezipeleri aýratyn orna eýedir. Matematika okuwçynyň zehinini ýiteldýär, onuň ünsüni bir ýere jemlemek ukybyny, takyklygy we yzygiderliligi terbiýeleýär. Mugallymyň wezipesi bolsa formulalaryň gelip çykyşyny we gündelik durmuşda nähili ulanylýandygyny düşündirmekdir. Häzirki wagtda okuw prosesine täze tehnologiýalaryň we interaktiw usullaryň ornaşdyrylmagy matematikanyň has-da düşnükli we gyzykly bolmagyna ýardam edýär.
Şeýle hem matematikany okatmagyň usulyýetiniň möhüm wezipeleriniň biri okuwçylaryň özbaşdak işlemek endiklerini kemala getirmekdir. Bu bolsa geljekki hünärmenleriň islendik çylşyrymly ýagdaýda dogry çözgüt tapyp bilmegine itergi berýär. Şol sebäpli hem matematika dersiniň mazmuny we ony okatmagyň usullary yzygiderli kämilleşdirilip, olar häzirki döwrüň talaplaryna laýyk getirilmelidir. Munuň özi okuwçynyň ylym-bilim dünýäsine bolan höwesini artdyrmak bilen bir hatarda, onuň intellektual derejesiniň ýokarlanmagyna uly goşant goşýar.
Ýurdumyzyň umumy bilim berýän orta mekdeplerinde matematika dersini okatmagyň hili döwrebap tehnologiýalar we kämil okuw maksatnamalary esasynda yzygiderli ýokarlanýar. Ýaş nesle berilýän bilimiň mazmuny logiki pikirlenmegi ösdürmäge, sanly ulgamyň mümkinçiliklerinden giňden peýdalanmaga hem-de nazaryýeti amalyýet bilen utgaşdyrmaga gönükdirilendir. Bilim ulgamynda döredilýän şeýle giň mümkinçilikler ýaşlaryň dünýä derejesinde bäsleşige ukyply hünärmenler bolup ýetişmegine uly itergi berýär. Şeýle döwrebap şertleri döredip, ylym-bilim ýolunda uly tagallalar edýän Gahryman Arkadagymyza hem-de Arkadaly Gahryman Serdarymyza tüýs ýürekden sagbolsunlarymyzy aýdýarys.
Allamyrat MÄMMEDOW,
Mary etrabynyň Çary Gurbangylyjow adyndaky 19-njy orta mekdebiniň okuw işleri boýunça orunbasary.
