Türkmenistanyň Prezidenti Serdar Berdimuhamedow ýurdumyza gelen Gyrgyz Respublikasynyň Ministrler Kabinetiniň Başlygy Adylbek Kasymaliýewi kabul etdi. Bu barada Gyrgyz Respublikasynyň metbugat gullugy habar berýär. Duşuşygyň başynda hökümet baştutany Türkmenistanyň Baştutanyna Gyrgyz Respublikasynyň Prezidenti Sadyr Žaparowyň mähirli salamyny we iň gowy arzuwlaryny ýetirdi.
Ikiçäk söhbetdeşligiň dowamynda türkmen-gyrgyz hyzmatdaşlygynyň gün tertibinde duran birnäçe möhüm meseleler giňişleýin ara alnyp maslahatlaşyldy. Taraplar iki ýurduň arasyndaky söwda-ykdysady we ynsanperwer gatnaşyklary has-da ösdürmäge, şeýle hem energetika we ulag pudaklarynda özara bähbitli hyzmatdaşlygy pugtalandyrmaga aýratyn üns berdiler.
Mälim bolşy ýaly, Gyrgyz Respublikasynyň Ministrler Kabinetiniň Başlygy Aşgabada amala aşyran bu saparynyň çäklerinde GDA-nyň Hökümet Baştutanlarynyň Geňeşiniň nobatdaky mejlisine gatnaşdy.
