Türkmenistan bilen Pakistanyň täjirçilik banky «HabibMetro Bank» göni korrespondent gatnaşyklary ýola goýmak meselesini ara alyp maslahatlaşdy. Degişli meselä Türkmenistanyň Pakistandaky Adatdan daşary we Doly ygtyýarly ilçisi Atajan Möwlamowyň bankyň daşary ýurt wekilhanalary bilen işleşmek boýunça bölüminiň ýolbaşçysy Fatima Zehra tarapyndan ýolbaşçylygyndaky wekiliýet bilen geçiren duşuşygynda garaldy.
Duşuşygyň dowamynda taraplar maliýe-bank ulgamynda hyzmatdaşlygy giňeltmäge, şol sanda hasaplaşyk mehanizmlerini kämilleşdirmäge we bilelikdäki taslamalary goldamaga aýratyn üns berdiler. Bu barada Türkmenistanyň Pakistandaky Ilçihanasy penşenbe güni habar berdi.
Habara bellenilişi ýaly, taraplar iki ýurduň maliýe edaralarynyň arasyndaky hyzmatdaşlygy güýçlendirmäge bolan isleglerini mälim etdiler. Bu ýagdaýyň işewürlik üçin has amatly şertleri döretmäge we maýa goýumlary artdyrmaga ýardam etjekdigi bellendi.
Duşuşygyň netijeleri boýunça taraplar dialogy mundan beýläk-de dowam etdirmek we hyzmatdaşlygyň anyk ugurlaryny öňe sürmek barada ylalaşdylar.
«HabibMetro Bank» — Pakistanyň öňdebaryjy täjirçilik banklarynyň biri bolup, ol Şweýsariýanyň “Habib Bank AG Zurich” toparyna girýär. 1992-nji ýylda esaslandyrylan bu bank söwda maliýeleşdirmesine we bölekleýin hyzmatlara ýöriteleşýär hem-de onuň düzümine 550-den gowrak şahamça girýär.
«THE ASHGABAT TIMES».
