Şu gün, 22-nji maýda Türkmenistanyň Prezidenti Serdar Berdimuhamedow ýurdumyza iş sapary bilen gelen Azerbaýjan Respublikasynyň Premýer-ministri Ali Asadowy kabul etdi.
Azerbaýjan Respublikasynyň Ministrler Kabinetiniň resmi saýtynyň berýän habaryna görä, duşuşygyň başynda hökümet baştutany Türkmenistanyň Liderine Azerbaýjan Respublikasynyň Prezidenti Ilham Aliýewiň mähirli salamyny we iň gowy arzuwlaryny ýetirdi. Döwlet Baştutanymyz Serdar Berdimuhamedow mähirli salam we hoşniýetli sözler üçin minnetdarlyk bildirip, öz gezeginde Azerbaýjanyň Ýolbaşçysyna hem belent sarpasyny we salamyny ýetirmegi haýyş etdi.
Gepleşikleriň dowamynda taraplar iki doganlyk döwletiň arasyndaky özara ynama we bähbitlilige esaslanýan syýasy dialogyň ýokary derejede we işjeň ösýändigini aýratyn bellediler. Şeýle-de duşuşykda dürli ugurlarda, aýratyn-da ykdysady we medeni-gumanitar ulgamlarda ikitaraplaýyn hyzmatdaşlygy has-da giňeltmegiň geljegi uly bolan täze mümkinçilikleri giňişleýin ara alnyp maslahatlaşyldy.
