Düýn – 8-nji maýda döwlet Baştutanymyz Serdar Berdimuhamedowyň gatnaşmagynda Balkan welaýatynyň Türkmenbaşy şäherindäki «Balkan» gämi gurluşyk we abatlaýyş zawodynda täze gurlan «Gadamly» gury ýük gämisini ýüzüşe goýbermek dabarasy geçirildi.
«Gadamly» gury ýük gämisini ýüzüşe goýbermek dabarasyna ýurdumyzyň ýolbaşçy düzümi, Türkmenistanda ýerleşýän daşary ýurtlaryň diplomatik wekilhanalarynyň hem-de halkara guramalaryň ýolbaşçylary, köpçülikleýin habar beriş serişdeleriniň wekilleri, ýaşlar gatnaşdylar.
Hormatly Prezidentimiz «Gadamly» gury ýük gämisini ýüzüşe goýbermek dabarasy mynasybetli çykyş edip, oňa gatnaşyjylary mukaddes Garaşsyzlygymyzyň şanly 35 ýyllygynyň giňden dabaralandyrylýan «Garaşsyz, baky Bitarap Türkmenistan — bedew batly at-myradyň mekany» ýylynyň bu ajaýyp wakasy mynasybetli gutlady. Ýük göterijiligi 6100 tonna bolan bu ýük gämisi «Balkan» gämi gurluşyk we abatlaýyş zawody tarapyndan halkara standartlara laýyklykda gurnaldy. Şoňa görä-de, dabaranyň dowamynda «Gadamly» ýük gämisiniň gurluşygynyň üstünlikli tamamlanmagy mynasybetli «Balkan» gämi gurluşyk we abatlaýyş zawodyna we gäminiň özüne Koreýa Respublikasynyň «Koryo Shipbuilding Industry Technology Co., Ltd.» kompaniýasynyň, şeýle hem Fransiýa Respublikasynyň «Bureau Veritas» klassifikasion jemgyýetiniň ýörite şahadatnamalary gowşuryldy.
Döwlet Baştutanymyzyň täze ýük gämisinde döredilen şertler bilen tanyşmagy, hususan-da, ony işe girizmäge ak pata bermegi, şol pursatda gäminiň baş hereketlendirijisiniň işjeň ýagdaýa geçip, gudok sesiniň ýaňlanmagy dabaranyň iň ýatda galyjy pursatlaryna öwrüldi. Şeýle hem «Gadamly» gury ýük gämisiniň ýüzüşe goýberilmegi mynasybetli milli däp-dessurlaryň berjaý edilmegi, toý sadakasynyň berilmegi asyrlar aşyp gelýän asylly ýörelgelerimiziň dowamat-dowama atarylýandygyny alamatlandyrdy.
«THE ASHGABAT TIMES».
