2026-njy ýylyň 14-15-nji maýynda Türkmenistanyň Rumyniýadaky Ilçihanasy Buharestdäki Politehnika Milli Ylym we Tehnologiýa Uniwersitetinde geçirilen 2026-njy ýyldaky “POLI International Fest” 2026 atly Halkara Festiwalyna gatnaşdy. Bu barada Türkmenistanyň Rumyniýadaky Ilçihanasy habar berdi.
Festiwalyň dowamynda umumy mejlisler, daşary ýurt uniwersitetleriniň wekilleri bilen duşuşyklar, medeni tanyşdyryşlar we tematiki sergiler geçirildi. Bu çärä Ilçihanalaryň, akademiki toparlaryň, halkara guramalarynyň, işewür we medeni jemgyýetleriň wekilleri gatnaşdylar.
Çärede Türkmenistanyň Ilçihanasy Rumyniýada akkreditirlenen beýleki ilçihanalaryň we halkara guramalarynyň sergileri bilen bir hatarda, Türkmenistanyň medeni baýlyklaryna bagyşlanan sergini gurnady. Sergide Türkmenistanyň medeni mirasyny, däp-dessurlaryny we häzirki zaman gazananlaryny şöhlelendirýän suratlar, elde dokalan halylar, milli lybaslar, milli saz gurallary, el işleri we keşdeler, şeýle hem hormatly Arkadagymyz, Türkmen Halkynyň milli Lideri Gurbanguly Berdimuhammedowyň we Türkmenistanyň Prezidenti Serdar Berdimuhammedowyň döredijilik neşirleri görkezildi.
Festiwalda halkara akademiki hyzmatdaşlyk, ýaşlar alyş-çalyşy, innowasiýa we sanly tehnologiýalar meseleleri ara alnyp maslahatlaşyldy.
Bu çärä gatnaşmak bilen Türkmenistan halkara ynsanperwer we bilim gatnaşyklarynyň has-da pugtalanmagyna hem-de medeni we ylmy mümkinçilikleriniň halkara derejesinde öňe ilerlemegine öz goşandyny goşdy.
