Berkarar döwletiň täze eýýamynyň Galkynyşy döwründe ylym-bilim ulgamy ýurdumyzyň ösüşleriniň berk binýadyna öwrüldi. Gahryman Arkadagymyzyň hem-de hormatly Prezidentimiziň alyp barýan parasatly syýasaty netijesinde ýaşlaryň döwrebap bilim almagy, ylmy gözlegler bilen meşgullanmagy we öz ukyp-başarnyklaryny doly açyp görkezmegi üçin giň mümkinçilikler döredilýär.
Ylym-bilim ynsanyň kämilleşmeginiň, jemgyýetiň ösüşiniň we döwletiň kuwwatlanmagynyň esasy şertidir. Zehinli ýaşlaryň yhlasly zähmeti, maksada okgunlylygy we ylma bolan höwesi olaryň geljekde ýokary derejeli hünärmenler, alymlar we watansöýüji şahsyýetler bolup ýetişmegine ýardam edýär.
Täze taryhy döwrümizde Gahryman Arkadagymyzyň hem-de Arkadagly Gahryman Serdarymyzyň tagallalary netijesinde türkmen ýaşlary dünýä derejesindäki olimpiadalarda, halkara bäsleşiklerde üstünlikli çykyş edip, ýurdumyzyň abraýyna abraý goşýarlar. Şunda «Garaşsyz, baky Bitarap Türkmenistan — bedew batly at-myradyň mekany» ýylynyň ýanwar — aprel aýlarynda okuwçylaryňdyr talyplaryň halkara ders bäsleşiklerine, olimpiadalara gatnaşyp, jemi 807 medal gazanmagy aýratyn bellärliklidir. Şeýle hem ýurdumyzyň ýokary okuw mekdepleri tarapyndan halkara olimpiadalaryň 6-sy, halkara ylmy-amaly maslahatlaryň 7-si, mekdep okuwçylarynyň arasynda III Halkara matematika olimpiadasy üstünlikli geçirildi.
Biziň institutymyzda hem ýaşlaryň döredijilik mümkinçiliklerini ýüze çykarmaga uly üns berlip, talyplarymyz dürli bilim olimpiadalarynda, ylmy bäsleşiklerde ýokary netijeleri gazanýarlar. Bularyň ählisi ýurdumyzyň intellektual kuwwatyny artdyrmaga, ykdysadyýetiň innowasion ösüşini üpjün etmäge hem-de ýaşlaryň ylym-bilim arkaly täze üstünliklere ýetmegine berk esas döredýär. Ýurdumyzda ylym-bilim ulgamyny ösdürmäge uly ähmiýet berýän Gahryman Arkadagymyzyň hem-de hormatly Prezidentimiziň janlary sag, belent başlary aman bolsun!
Zuhra DAWLATOWA,
Seýitnazar Seýdi adyndaky Türkmen döwlet mugallymçylyk institutynyň Takyk bilimleri fakultetiniň Fizika we informatika hünäriniň 4-nji ýyl talyby.
