Her bir güni ösüş-özgerişlere beslenýän täze taryhy eýýamda ata Watanymyzda durmuşa geçirilýän belent maksatly işler aýdyň geljegi nazarlaýar. Şunda ýurdumyzyň ähli ugurlaryny döwrebap ösdürmek, jemgyýetçilik işlerine ýaşlaryň işjeň gatnaşmaklaryny gazanmak üns merkezinde saklanýar. Şoňa görä-de, kanunçylyk hem-de hukuk binýadymyzy döwrebaplaşdyrmak, raýatlaryň hukuk medeniýetini ösdürmek hormatly Prezidentimiziň alyp barýan döwlet syýasatynyň esasy ugurlarynyň biridir.
Her bir döwletiň we jemgyýetiň sazlaşykly ösüşi hukuk medeniýetiniň döwrüň ruhuna laýyk derejede ösdürilmegi bilen aýrylmaz baglydyr. Bu ugurda amala aşyrylýan giň möçberli özgertmeler ýaşlaryň dünýägaraýşyny giňeltmek, olarda watansöýüjiligi, ynsanperwerligi pugtalandyrmak babatda aýratyn ähmiýetlidir. Munuň özi jemgyýetiň ykdysady, syýasy we medeni durmuşynyň sazlaşygyny üpjün edýär. Ýeri gelende, milli köpçülikleýin habar beriş serişdeleriniň wekillerine aýratyn ornuň degişlidigini, ýaşlaryň hukuk taýdan terbiýelenmeginde, ýaşlar jemgyýetiniň ähli ugurlar boýunça sazlaşykly ösüşinde žurnalistikanyň hem möhüm orun eýeleýändigini aýratyn bellemek gerek.
Ýaşlara uly üns berilýän ýurdumyzda jemgyýetiň bu gatlagyna ata Watanymyzyň belent ösüşleriniň binýadyny goýjak nesiller hökmünde garalýar. Bu bolsa Garaşsyz, hemişelik Bitarap Türkmenistany durmuş-ykdysady taýdan ählitaraplaýyn ösdürmegi esasy maksat edinýän kanunlardyr maksatnamalarda öz beýanyny tapýar. Munuň özi ýurdumyzda amala aşyrylýan giň gerimli özgertmeleriň milli kanunçylygymyzy döwrebaplaşdyrmak bilen sazlaşykly amala aşyrylýandygynyň aýdyň güwäsidir. «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasynyň» tassyklanylmagy, «Ýaşlar barada döwlet syýasaty hakynda» Türkmenistanyň Kanunynyň rejelenen görnüşiniň kabul edilip, onuň üstünlikli durmuşa geçirilmegi ýurdumyzda ýaşlar kanunçylygynyň döwrebap ösdürilýändiginden habar berýär.
Gahryman Arkadagymyzyň hem-de hormatly Prezidentimiziň tagallalary bilen ýaşlaryň hukuklaryny we azatlyklaryny doly derejede üpjün etmek üçin zerur bolan syýasy, ykdysady, hukuk şertleriniň döredilmegi möhüm ähmiýete eýedir. Bu bolsa ýaşlaryň jemgyýetde özleriniň mynasyp ornuny tapmaga, şeýle hem olaryň hukuk medeniýetini ösdürmäge uly ýardam berýär.
Arslan HALJANOW,
Türkmenistanyň Adalat ministriniň ýanyndaky Gozgalmaýan emläge bolan hukuklaryň we onuň bilen bagly geleşikleriň döwlet tarapyndan bellige alynmagy baradaky gullugynyň Daşoguz welaýat müdirliginiň döwlet sanawyny alyp barýan döwlet bellige alyjysy.
