Ynsan gurluşynyň, onuň dünýägaraşynyň we zehin binýadynyň iň çalt kemala gelýän döwri — mekdebe çenli ýaşdyr. Şonuň üçin hem bilim ulgamyndaky islendik özgertmäniň gözbaşy hut çagalar baglaryndan ugur almalydyr. Türkmenistanda okatmagyň usulyýetini kämilleşdirmegiň 2028-nji ýyla çenli Konsepsiýasy şu günki gün bilim we terbiýeçilik edaralarynyň öňünde düýbünden täze wezipeleri goýdy. Häzirki wagtda mekdebe çenli bilim edaralarynda okatmagyň usulyýetini dünýä standartlaryna laýyk getirmek, pedagogik işgärleriň hünär derejesini yzygiderli ýokarlandyrmak we iň döwrebap tehnologiýalary amalyýete ornaşdyrmak işi iň möhüm ugurlaryň biri hökmünde üns merkezinde saklanýar.
Döwrebap pedagog — bu diňe bir taýýar maglumaty çaga ýetirýän adam däl-de, eýsem, çaganyň içki dünýäsindäki gizlin zehin uçgunlaryny tapýan we ony sanly dünýäniň mümkinçilikleri bilen baýlaşdyrýan gözlegçi şahsyýetdir. Häzirki wagtda ýaş nesilleriň maglumatlary kabul ediş aýratynlygy öňki döwürlerdäkinden düýpli parhlanýar. Olar wizual, ýagny göz bilen görüp, sesleri eşitmek we amaly taýdan synap görmek arkaly dünýäni has çalt tanaýarlar. Ine, şu ýerde sapaklarda sanlylaşdyrylan serişdeleri — interaktiw tagtalary, öwrediji elektron oýunlary we multimediýa programmalaryny ulanmak zerurlygy ýüze çykýar. Sanly gurallar arkaly guralýan sapaklar çaganyň diňe bir ýatkeşligini ösdürmek bilen çäklenmän, eýsem, onda logiki oýlanma, derňew geçirmek we çalt çözgüt tapmak başarnyklaryny hem kemala getirýär.
Emma iň kämil tehnologiýa hem, professional pedagogiň döredijilikli gözlegleri bolmasa, diňe gury gural bolup galar. Şol sebäpli biziň tejribämizde pedagogik işgärleriň özbaşdak döredijilikli taslamalary işläp düzmäge bolan ukyplaryny baýlaşdyrmaga aýratyn ähmiýet berilýär. Taslama usuly — bu mugallymyň ýa-da terbiýeçiniň öz ugruna täzeçe garamagyna, adaty sapagy uly bir ylmy-gözleg ýa-da döredijilik meýdançasyna öwürmegine mümkinçilik berýär. Her bir terbiýeçi öz sapagyny guran mahaly, multimediýa serişdelerini milli terbiýäniň, ata-babalarymyzdan gelýän pelsepewi ýörelgeleriň ruhy bilen utgaşdyrmalydyr. Meselem, sanly serişdeleriň üsti bilen halk ertekilerini interaktiw görnüşde görkezmek ýa-da çagalaryň multimedia oýunlary arkaly ene diliniň baýlygyny öwrenmegini gazanmak — pedagogik döredijiligiň miweleridir.
Ajaýyp zamanamyzda döredijilikli işlemäge, jemgyýetçilik çärelerine gatnaşyp abraý gazanmaga, ilhalar ogul-gyzlary, kämil perzentleri ösdürip ýetişdirmäge, olaryň irki ösüşini we mekdebe taýýarlygyny gazanmaga gönükdirilen giň mümkinçilikler üçin Gahryman Arkadagymyza hem-de Arkadagly Gahryman Serdarymyza bagtyýar çagalaryň, ata-eneleriň hem-de ähli bilim-terbiýeçilik düzümleriniň agzybir işgärleriniň köňül alkyşlary egsilmezdir.
Maral MEMIÝEWA,
Çärjew etrabynyň 2-nji çagalar bakja-bagynyň terbiýeçisi.
