Russiýa Federasiýasynyň paýtagty Moskwa şäherinde 4 — 6-njy iýun aralygynda Türkmenistanyň Medeniýet günleri geçiriler. Iki ýurduň arasyndaky dostlukly we medeni gatnaşyklary has-da berkitmäge gönükdirilen bu giň gerimli çäre Russiýanyň we Türkmenistanyň Medeniýet ministrlikleri tarapyndan, Türkmenistanyň Russiýa Federasiýasyndaky ilçihanasynyň hem-de «Roskonsert» federal döwlet býujet medeniýet edarasynyň bilelikde guramagynda amala aşyrylýar.
Medeniýet günleriniň maksatnamasynyň çäginde watandaşlarymyzyň we daşary ýurtly sungat söýüjileriň gatnaşmagynda birnäçe dabaraly çäreler meýilleşdirildi. Türkmenistanly döredijilik wekilleriniň gatnaşmagyndaky ilkinji dabaraly konsert 4-nji iýunda «Russkaýa pesnýa» teatrynda Moskwa wagty bilen sagat 19:00-da bolar. Sungat baýramçylygy 6-njy iýunda «Et Cetera» teatrynda Moskwa wagty bilen sagat 18:00-da guraljak ýapylyş konserti bilen jemlener.
Medeni çäreleriň çäginde diňe bir aýdym-sazly çykyşlar bilen çäklenilmän, eýsem halkymyzyň baý mirasyny tanatmaga niýetlenen şekillendiriş we amaly-haşam sungatynyň sergileri hem guralar. Şeýle-de sergide milli däp-dessurlaryň we gadymy senetçiligiň nusgalarynyň görkezilişi hem bolar.
Medeniýet günleriniň çärelerine giriş dolulygyna mugt bolup, oňa gatnaşmak isleýän tomaşaçylar öňünden hasaba durmak arkaly dabaralara gatnaşyp bilerler.
