Wýetnamyň Danang şäherinde ýetginjekleriň arasynda geçirilen erkin we grek-rim göreşi boýunça Aziýa çempionatynda Türkmenistanyň ýygyndy toparynyň agzasy uly üstünlik gazandy. Gadyrly pälwanymyz Şaapbas Esgerow 80 kilograma çenli agram derejesinde görkezen ýokary ussatlygy netijesinde Aziýanyň bürünç medalyna mynasyp boldy.
Üçünji orun ugrunda geçirilen tutluşykda Şaapbas Esgerow ýaponiýaly pälwan Ýuseý Nagatany 9:3 hasabynda ýeňip, bürünç medala eýe boldy.
Bu agram derejesiniň final duşuşygynda bolsa eýranly pälwan Amirali Mohammad Ferasati hindistanly Mandip Mandipi 10:0 hasabynda rüstem gelip, altyn medaly eýeledi. Ýaryşyň beýleki bürünç medalyna bolsa täjigistanly Nasim Hojaýewi 12:1 hasabynda ýeňmegi başaran gazagystanly türgen Adilbek Erbolatow eýe boldy.
Bu ýaryşda Türkmenistanyň ýygyndy toparynyň düzüminde jemi 10 türgen çykyş etdi. Olaryň 6-sy erkin göreşde, 4-si bolsa grek-rim göreşinde güýç synanyşdy.
