Garaşsyzlygyny gazanyp galkynan, Bitaraplygy bilen beýgelen agzybir halkymyzy bu mukaddes gymmatlyklara bolan belent hormat-sarpa, eziz Watanymyza egsilmez söýgi has-da jebisleşdirýär, täze üstünliklere, beýik ösüşlere ruhlandyrýar. Mukaddes Garaşsyzlygymyzyň ýetip gelýän şanly 35 ýyllygy türkmen halkynyň şöhratly taryhynyň nurana sahypalarynyň birine öwrüler.
Mälim bolşy ýaly, hormatly Prezidentimiziň degişli Karary bilen “Garaşsyz, baky Bitarap Türkmenistan — bedew batly at-myradyň mekany” ýyly mynasybetli atçylyk we atçylyk sport ugurlary boýunça çäreleriň Maksatnamasynyň tassyklanylmagy şanly ýylyň ähmiýetini has-da artdyrdy. Garaşsyzlyk baýramçylygynyň giň gerimde bellenilmegi häzirden sazlaşykly işiň alnyp barylmagyny talap edýär. Bu çäreleriň ýokary derejede guramaçylykly geçirilmegine mynasyp goşant goşmak her birimiziň öňümizde durýan möhüm wezipedir.
Her ýylyň güýzünde, adatça bolşy ýaly, Türkmenistanyň Döwlet münberiniň öňündäki giň meýdançada Garaşsyzlygymyzyň şanly toýy mynasybetli geçirilýän baýramçylyk dabaralary hemmämiziň kalbymyzda berkarar döwletliligimize bolan buýsanç duýgusyny joşdurýar. Şol dabaralaryň iň ajaýyp pursatlarynyň biri hem ahalteke bedewleriniň baýramçylyk ýörişidir. Däp bolşy ýaly, dabaraly harby ýörişden soň, meýdança türkmen halkynyň milli buýsanjy bolan ahalteke bedewleri çykanda, baýramçylyk şatlygy täze bir öwüşgine eýe bolýar. Nesip bolsa, ýurdumyzyň Garaşsyzlygynyň 35 ýyllygy mynasybetli geçiriljek baýramçylyk dabaralary-da şeýle ýatda galyjy wakalara baý bolar.
Garaşsyzlyk — halkyň ykbaly. Her bir günümiziň şanly toýuň dabaralary bilen beslenmegi ýüregimizi has-da joşduryp, ruhumyzy galkyndyrýar. Biz — ýaşlara ähli mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, döwletli işleri hemişe rowaç bolsun!
Sabina SETDAROWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby.
