Ýaşlaryň döwrebap bilim alyp, saýlap alan hünärleri boýunça ussat hünärmenler bolup ýetişmegi häzirki döwrüň esasy ugurlarynyň biridir. Ýurdumyzda ýaş nesliň ukyp-başarnygyny ösdürmek, olaryň nazary bilimlerini amaly tejribe bilen baýlaşdyrmak üçin giň mümkinçilikler döredilýär. Şoňa görä-de, biz her okuw ýylynda öz hünärimize görä degişli ýerlere, aýratyn hem, ýurdumyzyň gazet-žurnallarynyň redaksiýalaryna, milli teleradioýaýlymlarymyza önümçilik tejribeligine ýollanýarys. Şeýdibem, öwrenen zatlarymyzy tejribe üsti bilen has-da berkidýäris.
Talyplyk ýyllarynda dürli ugurlar boýunça geçirilýän önümçilik tejribelikleri ýaşlaryň hünär başarnyklaryny ösdürýän täsirli usullaryň biridir. Okuw döwründe öwrenilen maglumatlaryň iş ýüzünde synagdan geçirilmegi, hünärmenleriň maslahatlaryny diňlemek we degişli gurşawda tejribe toplamak ýaşlaryň özlerine bolan ynamyny artdyrýar. Ýaşlaryň hünär ýolunda gazanýan her bir tejribesi olaryň geljekki üstünlikleriniň berk binýadyny döredýär.
Tejribe döwründe ýaşlar saýlan hünärleriniň aýratynlyklary bilen has içgin tanyşýarlar. Olar iş ýerindäki tertip-düzgün, hünär jogapkärçiligi, döredijilikli çemeleşme ýaly möhüm ýörelgeleri öwrenýärler. Şeýle hem dürli işleri ýerine ýetirmek arkaly özleriniň başarnyklaryny kämilleşdirýärler we geljekki hünärlerine bolan höweslerini has-da güýçlendirýärler.
Hünär taýdan ösüş diňe bir bilim almak bilen çäklenmeýär. Ol yzygiderli öwrenmegi, täze tejribeleri özleşdirmegi we öz üstüňde işlemegi talap edýär. Şonuň üçin biz ― ýaşlaryň tejribe geçmegi geljekde ökde hünärmenler bolup ýetişmegimizde uly ähmiýete eýedir. Döredilýän şeýle mümkinçilikler ýaş nesliň öz mümkinçiliklerini doly açmagyna, döwrebap pikirlenýän, bilimli we zähmetsöýer hünärmenler bolup kemala gelmegine ýardam berýär.
Mähriban BERDIÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby.
