Tailand Patyşalygynyň Pattaýa şäherinde geçirilen 15 we 20 ýaşa çenli türgenleriň arasyndaky Aziýanyň çempionaty türkmen pälwanlary üçin uly üstünlik bilen tamamlandy: ýygyndy toparymyz grek-rim we erkin göreş boýunça jemi 5 medal gazandy. Şolaryň biri altyn, üçüsi kümüş, ýene biri hem bürünç medaldyr. Yklymyň 20 döwletinden türgenleriň 500-den gowragyny özünde jemlän ýaryşda türkmen türgenleriniň başarnygy uly seslenme döretdi.
20 ýaşa çenli türgenleriň arasynda Türkmen döwlet binagärlik-gurluşyk institutynyň talyby Döwletgeldi Myradow erkin göreş boýunça 92 kilograma çenli agram derejesinde altyn medala eýe bolup, Türkmenistanyň ýygyndysynyň bu çempionatdaky iň ýokary netijesini gazandy. Ol hytaýly garşydaşyny 10:0, eýranly Amirhosseýn Hakpakafşkarkolaýini 4:2 hasabynda ýeňdi, finalda bolsa gazagystanly Beýbarys Ýergalini 10:2 hasabynda utdy.
«THE ASHGABAT TIMES».
