Bilim ulgamynda durmuşa geçirilýän özgertmeler milli ykdysadyýetiň ösüş ugurlary bilen aýrylmaz baglanyşyklydyr. Şunda jemgyýetiň ösen talaplaryna esaslanýan ýörelgeler bilen kämilleşdirilýän milli ylym-bilim ulgamyny dünýäniň iň gowy tejribeleri esasynda ösdürmek baş maksatlaryň biri bolup durýar. Bu babatda «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasy» hem-de şu Strategiýany amala aşyrmak boýunça ýerine ýetirilmeli çäreleriň 2026 — 2030-njy ýyllar üçin meýilnamasy möhüm ähmiýete eýedir.
Berkarar döwletiň täze eýýamynyň Galkynyşy döwründe milli ylym-bilim ulgamyna aýratyn uly üns berlip, bu ugurda döwletli işler durmuşa geçirilýär. Kabul edilen milli maksatnamalaryň çäklerinde ýurdumyzyň ähli künjeklerinde orta we ýokary bilim edaralary, çagalar baglary ulanmaga berilýär hem-de täze, döwrebap binalaryň gurulmagy dowam etdirilýär. Olar öňdebaryjy okuw-tehniki serişdeler, interaktiw-multimedia tehnologiýalary, internet ulgamyna birikdirilen kompýuterler bilen doly üpjün edilendir.
Ýeri gelende bellesek, «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasy» durmuşa ornaşdyrylyp, ýokary bilimde halkara bilim standartlaryna laýyk getirilen hem-de milli bilim ulgamy üçin örän ähmiýetli bolan ulgam kemala geler. Munuň özi berkarar döwletimiziň ykdysady taýdan has-da kuwwatlanmagyna hyzmat eder. Strategiýanyň üstünlikli durmuşa geçirilmegi netijesinde, ýurdumyzda täze tehnologik öňegidişlikler gazanylar, durmuş-ykdysady ösüşiň belent sepgitlerine ýetiler, ilatyň ýaşaýyş-durmuş derejesi has-da ýokarlanar.
Ýokary hünär biliminiň netijeliligini artdyrmak, döwrebaplaşdyrmak babatdaky möhüm wezipeleriň üstünlikli çözülmegi ugrunda belent maksatlara badalga berýän Milli Liderimiziň hem-de hormatly Prezidentimiziň janlary sag, belent başlary aman, il-ýurt bähbitli beýik işleri elmydama rowaç bolsun!
Çynar ŞYHMYRADOWA,
S.A.Nyýazow adyndaky Türkmen oba hojalyk uniwersitetiniň 2-nji ýyl talyby.
