Halkara alymlar topary häzirki zaman adamyň genomynda öň ylma näbelli bolan gadymy hominin görnüşine degişli genetiki yzlary ýüze çykardy.
Gözlegçiler täze TRACЕ algoritminiň kömegi bilen bu açyşa ýetdi. Täze usul gadymy süňklerden alnan DNK nusgalaryna zerurlyk duýman, häzirki adam genomyndaky genetiki maglumatlary seljerýär.
Netijelere görä, bu syrly genetiki bölek Ýerdäki ähli adamlaryň DNK-synda 0,5–1,1 göterim aralygynda duş gelýär. Alymlar onuň ata-babalarynyň häzirki adamlardan takmynan 830 müň ýyl ozal bölünip çykandygyny çaklaýarlar.
Gözleg neandertallar we denisow adamlary bilen bagly öň belli bolan genetiki yzlary hem tassyklady. Şeýle-de bolsa, alymlar öň belli bolmadyk täze “ýitip giden nesiliň” genetiki alamatlaryny tapdylar.
Mundan başga-da, Okeaniýa halklarynyň genomlarynda has gadymy genetiki garyşma yzlary ýüze çykaryldy. Alymlaryň pikirine görä, bu aýratyn nesil takmynan 1,77 million ýyl ozal bölünip çykan bolup biler we oňa Homo erectus görnüşi degişli bolmagy mümkin.
Gözlegçiler bu açyşyň adam ewolýusiýasynyň has çylşyrymly bolandygyny görkezýändigini belleýärler. Täze hasaplaýyş algoritmleri geljekde gadymy adamlaryň taryhynyň ýitip giden böleklerini öwrenmäge mümkinçilik berip biler.
«THE ASHGABAT TIMES».
