«Garaşsyz, baky Bitarap Türkmenistan — bedew batly at-myradyň mekany» ýylynyň 23-nji sentýabrynda boljak Türkmenistanyň Halk Maslahatynyň nobatdaky mejlisi şanly ýylymyzyň esasy jemgyýetçilik-syýasy wakasyna öwrüler. Şoňa görä-de, umumymilli foruma ýokary derejede taýýarlyk görülýär. Türkmenistanyň Halk Maslahatynyň Prezidiumynyň 15-nji iýulda geçirilen mejlisi Halk Maslahatynyň nobatdaky mejlisine taýarlyk işlerine özboluşly badalga boldy.
Berkarar döwletiň täze eýýamynyň Galkynyşy döwründe gazanylýan ösüşleriň ählisi halkymyzyň abadan hem-de parahat durmuşda ýaşamagyna gönükdirilendir. Täze taryhy döwrümiz agzybir türkmen halkyna buýsançly wakalary, beýik özgertmeleri bagyşlaýar. Şu ýylyň 23-nji sentýabrynda paýtagtymyzdaky Maslahat köşgünde geçiriljek Türkmenistanyň Halk Maslahatynyň mejlisi hem ýylymyzy bezejek, kalplara buýsanç duýgusyny paýlajak möhüm wakalaryň birine öwrüler.
Şu ýerde ýaş nesilleriň halkymyza, mähriban Watanymyza wepaly şahsyýetler bolup ýetişmeklerinde ýaşululara uly ornuň degişlidigini aýratyn nygtamalydyrys. Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň şu ýylyň 26-njy maýynda geçirilen nobatdaky mejlisi munuň hakykatdan-da şeýledigini tassyklady. Sebäbi mejlisiň dowamynda hormatly Arkadagymyza ýakynda doglan we hossarsyz galyp, Aşgabat şäheriniň çagalar öýünde terbiýelenilýän gyzjagaza mynasyp at dakmak baradaky teklip bilen ýüzlenildi. Milli Liderimiziň Ýaşulular geňeşiniň agzalarynyň teklibini oňlap, bu çaga Arkadag gyzy Gurbangül diýip at dakmagy maslahat bermegi ýurdumyzda hossarsyz galan çagalara howandarlyk golunyň uzadylýandygyny, olaryň jemgyýetiň hem-de döwletiň durmuşyna doly derejede gatnaşmaga bolan hukugyny üpjün etmek ugrunda tagalla edilýändigini görkezýär.
Watanymyzyň beýik ösüş-özgertmeleriniň ählisi mukaddes Garaşsyzlygymyzyň beren ajaýyp miweleridir. Nobatdaky taryhy forumyň Garaşsyzlyk toýunyň bosagasynda geçirilmegi bolsa, toý şatlygymyza şatlyk goşýar. Goý, berkarar Watanymyzy ösüşleriň bedew bady bilen barha öňe alyp barýan, ulus-ilimizi eşretli durmuşda ýaşadýan Arkadagly Gahryman Serdarymyzyň we Gahryman Arkadagymyzyň döwletli başlangyçlarynda rowaçlyklar hemişe ýaran bolsun!
Tylla MUHADOWA,
Seýitnazar Seýdi adyndaky TDMI-niň Pedagogika fakultetiniň talyby.
