2026-njy ýylyň başyndan bäri dünýä tehnologiýa pudagynda 124 müňden gowrak işgär işden boşadyldy. Bu görkeziji eýýäm geçen ýylyň umumy netijesinden hem ýokary boldy. Layoffs.fyi hyzmatynyň maglumatlaryna görä, 2025-nji ýylda IT kompaniýalary takmynan 122 müň iş ýerini kemeldipdi. Bu barada Ixbt.com habar berýär.
Hünärmenleriň bellemegine görä, bu ýagdaý global tehnologiýa bazarynda uly gurluşlaýyn üýtgeşmeleriň bolup geçýändigini görkezýär. Iň uly işden çykarmalar «Oracle», «Amazon» we «Dell» kompaniýalarynyň paýyna düşdi. Bu kompaniýalaryň her biri müňlerçe iş ornuny azaltmak meýilnamalaryny yglan etdi.
Täze işden çykarmalar emeli aň (AI) ugruna edilýän rekord derejedäki maýa goýumlaryň artýan döwrüne gabat geldi. Uly tehnologiýa kompaniýalary maglumat merkezlerini gurmak, ýokary öndürijilikli AI enjamlaryny satyn almak we öz önümlerine emeli aň mümkinçiliklerini ornaşdyrmak üçin milliardlarça dollar serişde gönükdirýärler.
Mysal üçin, «Oracle» geljekki maliýe ýylynda emeli aň tehnologiýalaryny ösdürmek üçin takmynan 90 milliard dollar maýa goýmagy meýilleşdirýär. «Amazon» hem emeli aň infrastrukturasyny ösdürmek üçin onlarça we ýüzlerçe milliard dollarlyk maýa goýumlaryny dowam etdirýär.
Şeýle-de bolsa, kompaniýalaryň özleri işgärleriň azaldylmagyny diňe emeli aňyň ösüşi bilen düşündirmeýärler. Esasy sebäpleriň arasynda COVID-19 pandemiýasy döwründe işgärleriň aşa köp işe alynmagy we guramaçylyk gurluşyny yzygiderli optimizasiýa etmek zerurlygy görkezilýär.
«PricewaterhouseCoopers» (PwC) tarapyndan geçirilen gözleglere görä, emeli aň uzak möhletde käbir iş orunlarynyň ýitmegine sebäp bolup bilse-de, şol bir wagtda täze hünärleri we iş mümkinçiliklerini hem döredip biler. Emeli aňy işjeň ornaşdyrýan kompaniýalar bu tehnologiýany haýal kabul edýän kärhanalara garanyňda has çalt depginde täze işgärleri işe almagy dowam etdirýärler.
Munuň mysaly hökmünde emeli aň senagatynyň dünýä merkezleriniň biri bolan San-Fransisko şäherini görkezmek bolýar. Tehnologiýa pudagyndaky uly işden çykarmalara garamazdan, «OpenAI» we «Anthropic» ýaly emeli aň kompaniýalarynyň täze işgärleri işe almagy netijesinde şäherdäki işsizlik derejesi 3,7 göterime çenli peseldi.
Hünärmenleriň pikiriçe, häzirki ýagdaý diňe bir iş orunlarynyň kemelmegini däl, eýsem tehnologiýa pudagynda täze hünärleriň, başarnyklaryň we iş ugurlarynyň döremegini hem görkezýär.
«THE ASHGABAT TIMES».
