Türkmen jemgyýetiniň taryhy ösüş ýolunda halkyň agzybirligi, jebisligi we döwlet ähmiýetli meseleleri çözmekde işjeň gatnaşmagy aýratyn orun eýeleýär. Şu nukdaýnazardan, Türkmenistanyň Halk Maslahaty döwlet bilen halkyň arasynda sazlaşykly gatnaşyklaryň, giň jemgyýetçilik pikiriniň we milli bähbitleriň utgaşýan möhüm meýdançasydyr. Şunuň bilen baglylykda, häzirki döwürde Türkmenistanyň Halk Maslahatyna taýýarlyk işleri ýurdumyzyň ähli künjeklerinde ýokary guramaçylyk derejesinde alnyp barylýar.
Halk Maslahaty türkmen halkynyň asylly däplerine daýanýan, döwlet we jemgyýetçilik durmuşynda möhüm ähmiýete eýe bolan gurluşdyr. Türkmen halkynyň gadymdan gelýän maslahatlaşmak, agzybirlikde çözgüt kabul etmek ýörelgeleri häzirki döwürde döwrebap görnüşde dowam etdirilýär. Şol sebäpli hem Halk Maslahatynyň geçirilmegine taýýarlyk işleri halkyň dürli gatlaklarynyň işjeň gatnaşmagyny üpjün etmek bilen utgaşýar. Bu ugurdaky çäreler diňe bir guramaçylyk meselelerini çözmek bilen çäklenmän, eýsem, halkyň tekliplerini öwrenmäge, jemgyýetçilik ähmiýetli başlangyçlary ara alyp maslahatlaşmaga we geljekki ösüş maksatlaryny kesgitlemäge gönükdirilendir.
Taýýarlyk döwründe ýurdumyzyň dürli ulgamlarynda zähmet çekýän raýatlaryň, ýaşlaryň, ýaşulularyň, jemgyýetçilik guramalarynyň wekilleriniň teklipleriniň öwrenilmegine aýratyn ähmiýet berilýär. Sebäbi halkyň pikirini nazara almak, jemgyýetiň ösüşine gönükdirilen başlangyçlary goldamak Türkmenistanyň döwlet syýasatynyň möhüm ugurlarynyň biridir.
Halk Maslahatyna taýýarlyk işlerinde ýaş nesle aýratyn orun degişlidir. Ýaşlar — ýurdumyzyň geljegi, täze pikirleriň we döredijilikli başlangyçlaryň eýeleridir. Şonuň üçin hem ýaşlaryň jemgyýetçilik durmuşyna işjeň gatnaşmagy, olaryň teklipleriniň diňlenmegi we goldanylmagy möhüm ähmiýete eýedir. Häzirki döwrüň ýaşlary bilimde, ylymda, tehnologiýada, sportda we döredijilikde gazanýan üstünlikleri bilen Türkmenistanyň ösüşine mynasyp goşant goşýarlar.
urdumyzda geçirilýän wagyz-nesihat çäreleri, maslahatlar we duşuşyklar hem Halk Maslahatyna taýýarlygyň möhüm bölegi bolup durýar. Şeýle çäreleriň dowamynda döwlet ösüşiniň ileri tutulýan ugurlary, halkyň öňünde durýan wezipeler, jemgyýetiň agzybirligini pugtalandyrmak meseleleri barada pikir alşylyp, raýatlaryň teklipleri öwrenilýär. Mähriban halkymyzy ösüşleriň ýoly bilen öňe alyp barýan Gahryman Arkadagymyza, hormatly Prezidentimize köp sagbolsun aýdýarys.
Sewinç UMYDJANOWA,
Seýitnazar Seýdi adyndaky TDMI-niň Pedagogika fakultetiniň 3-nji ýyl talyby.
