Türkmen halkynyň döwletlilik ýörelgelerinde, asyrlaryň dowamynda kemala gelen agzybirlik, maslahatlaşyp çözgüt kabul etmek däbi aýratyn orun eýeleýär. «Halkda Hakyň ady bar», «Maslahatly biçilen don gysga bolmaz», «Geňeşli salamat bolar» diýen parasatly sözler halk durmuşynda giňden orun alypdyr. Şu ýylyň 23-nji sentýabrynda paýtagtymyzdaky Maslahat köşgünde geçiriljek Halk Maslahatynyň nobatdaky mejlisi bu durmuşy ýörelgäniň mynasyp dowamydyr.
Milli däp-dessurlarymyza eýerýän Türkmenistanyň Halk Maslahaty ýaşulular bilen ýaş nesliň arasyndaky baglanyşygy has aýdyň ýüze çykarýar. Halk Maslahatynda öňe sürülýän başlangyçlar esasynda ýaşlaryň bagtyýar şu gününi we geljegini nazarlaýan çözgütler kabul edilýär. Şunda ýakynda Gahryman Arkadagymyzyň Türkmenistanyň Halk Maslahatynyň Prezidiumynyň nobatdaky mejlisini geçirmegi milli demokratiýanyň ýörelgeleriniň ulgamlaýyn durmuşa geçirilýändigini subut edýär. Onda şanly senä we möhüm taryhy waka ýokary derejede taýýarlyk görmek boýunça döwlet Baştutanymyzyň tabşyryklaryny ýerine ýetirmegiň wajyp meselelerine garaldy.
Arkadagly Gahryman Serdarymyz «Ýaşlar — Watanyň daýanjy» atly kitabynda şeýle belleýär: «Türkmenistanyň Halk Maslahatynda garalýan meseleler ýurdumyzyň sazlaşykly ösüşi bilen bir hatarda, halkymyzyň, ylaýta-da, ýaş nesilleriň abadan durmuşynyň ýokary derejesini öz içine alýar». Şu nukdaýnazardan, ýaşlaryň amatly şertlerde ýaşamaklary, dynç almaklary, zähmet çekmekleri, döredijilik bilen meşgullanmaklary üçin berk kanunçylyk binýadyny kemala getirmek, olaryň geljekde watansöýüji, zähmetsöýer ýaşlar bolup ýetişmekleri ugrunda ähli zerur tagallalary etmek Türkmenistanyň Halk Maslahatynyň alyp barýan işiniň esasy ugurlarynyň biri bolup durýar.
Milli Liderimiziň hem-de hormatly Prezidentimiziň alyp barýan beýik işleri biz ― ýaş nesiller üçin döwletli başlangyçlara, ýokary üstünliklere badalgadyr. Gahryman Arkadagymyzyň: «Men Watanymyzyň güýç-kuwwaty, abraý-mertebesi hem-de beýik geljegi bolan ýaşlarymyzyň alyp barýan işlerine ýokary baha berýärin» diýen ganatly sözleri bolsa bizi beýik işlere ruhlandyrýar. Şeýle uly ynama ygrarly ýaşlar Milli Liderimize hem-de Arkadagly Gahryman Serdarymyza tüýs ýürekden alkyş aýdýarlar.
Medet SOLTANOW,
Türkmen döwlet maliýe institutynyň talyby.
