Hytaýly alymlar Ýere howp salyp biljek uly asteroidlerden goranyş üçin täze usuly hödürlediler. Täze çemeleşme asteroidleriň içinde ýadro zarýadyny partlatmak arkaly olaryň ýok edilmegini ýa-da hereket ugruny üýtgetmegi göz öňünde tutýar.
«Space: Science & Technology» žurnalynda çap edilen gözleg Hytaýyň «Raket-kosmos» tehnologiýalary akademiýasynyň alymlary tarapyndan geçirildi. Kompýuter modelleri ýadro zarýadyny asteroid ýüzünde däl-de, onuň çuň ýerinde ýerleşdirmegiň has netijelidigini görkezdi.
Hasaplamalara görä, diametri takmynan 100 metr bolan asteroidi ýok etmek üçin 3 megaton kuwwatly partlama gerek bolup biler. Alymlar zarýady takmynan 30 metr çuňlukda ýerleşdirmegiň iň ýokary netijeliligi üpjün edýändigini belleýärler.
Gözleg netijeleri bu usulyň hatda 1 kilometr ölçegli asteroidleriň hereket tizligini hem üýtgedip biljekdigini görkezýär. Alymlaryň maglumatlaryna görä, şeýle çemeleşme NASA-nyň 2022-nji ýylda geçirilen DART synagyndan has güýçli täsir berip biler.
Hünärmenler täze tehnologiýanyň diňe howply asteroidler öňünden anyklanan ýagdaýynda peýdaly boljakdygyny aýdýarlar. Şeýle missiýalar üçin ýörite kosmos enjamlaryny, güýçli raketa göterijilerini we degişli infrastruktura döretmek zerur bolar.
«THE ASHGABAT TIMES».
