Gazagystanda Merkezi Aziýanyň taryhynda ilkinji gezek ýolagçyly uçarmansyz howa taksisi uçuş amala aşyrdy. Bu barada Gazagystan Respublikasynyň Ulag ministrligi habar berdi.
«Geljek oýunlary — 2026» halkara ýaryşynyň çäklerinde Gazagystanyň paýtagty Astana şäherinde ýörite bölünip berlen çäkde «EH216-S» kysymly dikligine uçup-gonýan elektrik enjamy (eVTOL) görkezme uçuşyny amala aşyrdy.
Gazagystanyň hökümeti ilkinji tapgyrda ýurduň tebigy, medeni we taryhy gözel ýerleriniň üstünden dowamlylygy bäş minutdan 30 minuta çenli bolan görkezme we syýahatçylyk ugurlaryny ýola goýmak mümkinçiligine seredýär. Geljekde şeýle enjamlar şäher ulag ulgamynyň bir bölegine öwrülip, bar bolan gatnaw görnüşleriniň üstüni ýetirip biler.
Ýolagçy daşamakdan başga-da, uçarmansyz howa taksilerinden gyssagly lukmançylyk kömegini bermek, derman serişdelerini eltmek, gözleg-halas ediş işlerini geçirmek, ýangyn söndürmek we logistika wezipelerinde peýdalanmak meýilleşdirilýär.
«THE ASHGABAT TIMES».
