Türkmenistanyň Döwlet medeniýet merkeziniň Döwlet kitaphanasynda 7-nji awgustda türkmen edebiýatyny ösdürmäge uly goşant goşan halypalaryň ömür-döredijiligine bagyşlanan edebi duşuşyk geçirildi. Çärede Nargylyç Hojageldiýew, Orazguly Annaýew, Nobatguly Rejebow, Hojanepes Meläýew, Babanyýaz Kaýumow we Kasym Nurbadow ýaly edebiýat ägirtleri ýatlandy. Hatyra çäresine halypalaryň maşgala agzalary, nebereleri, ýazyjy-şahyrlar hem-de žurnalistler gatnaşdylar. Bu barada «Türkmenistan» gazeti habar berdi.
Duşuşygyň dowamynda Türkmenistanyň halk artisti Nury Allaberdiýew, «Watana bolan söýgüsi üçin» hem-de «Magtymguly Pyragy» medallarynyň eýesi Abdylla Yslamow, «Garagum» žurnalynyň edebi işgäri Öre Daşgynow we beýleki çykyş edenler halypalaryň baý döredijilik ýoly, olaryň ýazan powest-romanlary, sahna eserleri hem-de terjime ussatlygy barada täsirli gürrüňleri paýlaşdylar.
Şeýle hem çärede medeniýet işgärleri, alymlar, žurnalistler we halypalaryň perzentleri çykyş edip, aradan çykan ýazyjy-şahyrlaryň eserleriniň ýaş nesli watançylyk ruhunda terbiýelemekde uly ähmiýete eýedigini nygtadylar. Edebi duşuşyk milli edebiýatymyzda öçmejek yz goýan halypalara bolan belent hormat-sarpanyň dabaralanmagyna öwrüldi.
«THE ASHGABAT TIMES».
