Täze ylmy barlaglara görä, iş wagtynyň aýdan-aýa düýpli üýtgemegi işgärleriň saglyk ýagdaýyna ýaramaz täsir edip biler.
61 müňden gowrak amerikan işçisiniň maglumatlary seljerilende, iş tertibiniň durnuksyzlygynyň erkekler we aýallar üçin dürli görnüşde ýüze çykýandygy anyklandy.
Erkeklerde iş wagtynyň yzygiderli üýtgemegi bilen saglygyň ýaramazlaşmak ähtimallygynyň ýokarlanýandygy bellenildi. Mysal üçin, bir aýda 20 sagat, indiki aýda bolsa 60 sagat işlemek ýaly uly tapawutlaryň bedene goşmaça agram salýandygy ýüze çykaryldy.
Barlag netijelerine görä, iş tertibi durnukly bolan erkeklerde saglygyň ýaramazlaşmak ähtimallygy 28 göterim bolan bolsa, iş wagty iň köp üýtgeýän toparlarda bu görkeziji 38 göterime çenli ýokarlanypdyr.
Aýallarda bolsa başga ýagdaý syn edilipdir. Diňe işlemegini dowam etdiren aýallaryň arasynda durnuksyz iş tertibi bilen saglygyň ýaramazlaşmagynyň arasynda anyk baglanyşyk tapylmandyr.
Emma saglyk sebäpli iş wagtyny azaltmaga, wagtlaýyn işden çekilmäge ýa-da işini taşlamaga mejbur bolan ýagdaýlar hem hasaba alnanda, tapawut has aýdyň ýüze çykypdyr. Şeýle çäklendirmelere duçar bolmak ähtimallygy iň durnukly iş tertibinde 2,5 göterim bolan bolsa, iň üýtgeýän tertipde bu görkeziji 8 göterime golaýlapdyr.
Alymlar iş şertlerine baha berlende diňe bir aýlyk ýa-da umumy iş sagadynyň däl, eýsem iş tertibiniň durnuklylygynyň hem möhüm ähmiýete eýedigini belleýärler. Gözlegçiler iş wagtynyň ýygy-ýygydan üýtgemeginiň saglyk üçin töwekgelçilik döredip biljekdigini we bu ýagdaýyň erkekler hem-de aýallar üçin täsirlerini aýratyn öwrenmegiň zerurdygyny nygtaýarlar.
«THE ASHGABAT TIMES».
