Türkmenistan 35 ýyl mundan ozal özüniň Garaşsyzlygyny yglan edip, demokratik, hukuk we dünýewi döwlet gurluşyny saýlap aldy. Ýurdumyz şol taryhy wakadan soňra özygtyýarly hem-de erkin ösüş ýoluna gadam basdy we Garaşsyzlyk ýyllarynda ähli ulgamlar boýunça belent sepgitlere ýetdi. Munuň özi döwlet Garaşsyzlygymyzyň türkmen halkyna beren peşgeşidir. Berkarar döwletiň täze eýýamynyň Galkynyşy döwründe halkymyz hakynda aladany ilkinji nobatda goýýan Gahryman Arkadagymyzyň, Arkadagly Gahryman Serdarymyzyň tagallalary netijesinde döwletimiziň taryhyna altyn harplar bilen ýazylýan başlangyçlar durmuşa geçirilýär.
Garaşsyzlyk türkmen halkyny dünýä çykardy, onuň at-abraýyny, şan-şöhratyny, mertebesini, ruhy dünýäsini belende göterdi. Bu döwürde ýurduň, halkyň ykbaly bilen baglanyşykly islendik mesele iňňän oýlanyşykly, akylly-başly çözüldi. Garaşsyzlyk türkmene gurmaga we döretmäge giň mümkinçilikleri döretdi. Garaşsyzlyk ýyllary içinde Türkmenistan durnukly ösýän ýurtlaryň hataryna goşuldy. Beýleki ulgamlarda bolşy ýaly, ylym-bilim ulgamynda hem uly öňegidişlikler gazanyldy.
Garaşsyzlyk ata-babalarymyzyň arzuwlan ýoly bolup, Watanymyzy şöhratlandyrýan mukaddeslikdir. «Garaşsyz, baky Bitarap Türkmenistan — bedew batly at-myradyň mekany» ýylynda bagtyýar halkymyz ata Watanymyzyň şanly Garaşsyzlygynyň 35 ýyllygynyň baýramçylygyna mynasyp zähmet sowgatlary bilen barýar. Watanyň şöhratly geljegi, halkymyzyň asuda, bagtyýar durmuşy, ýaş nesliň sagdyn, döwrebap düşünjeli, päk ahlakly bolup ýetişmekleri babatdaky beýik başlangyçlar bu gün üstünliklere beslenýär.
Berkarar döwletiň täze eýýamynyň Galkynyşy döwründe her bir ildeşimiz ýurdumyzyň parahatlygyndan, bagtyýar durmuşdan, beýik ösüşlerden ylham alýar. Döwlet senamyzdaky: «Bitarap, Garaşsyz topragyň nurdur, // Baýdagyň belentdir dünýäň öňünde» diýen sözler bolsa halkyň Garaşsyz, Bitarap Türkmenistana mizemez söýgüsi bolup ýaňlanýar. Eziz halkymyz Garaşsyzlygyň peşgeş eden bagtyýar zamanasynda çäksiz buýsanç duýgusy bilen ýaşaýar. Häzirki ajaýyp döwrümizde mukaddes Garaşsyzlygymyza, eziz Watanymyza tüýs ýürekden buýsanýarys.
Myratmuhammet GURBANOW,
Ýagşygeldi Kakaýew adyndaky Halkara nebit we gaz uniwersitetiniň talyby.
