Ösümlikler tebigatyň iň gymmatly bölekleriniň biridir. Olar diňe bir planetamyzy bezäp, ýaşaýyş üçin zerur bolan kislorody öndürmek bilen çäklenmän, adamzadyň durmuşynda hem möhüm orun eýeleýär. Tebigatyň gözelligini alamatlandyrýan ösümlikler müňlerçe görnüşe bölünýär we dürli şertlerde ösmäge uýgunlaşýarlar.
Ösümlikleriň esasy aýratynlygy fotosintez prosesiniň üsti bilen güne şöhlesini ulanyp, kömürturşy gazyny kisloroda öwürmekdir. Bu ajaýyp proses diňe bir ösümlikleriň ösmegine ýardam etmän, adamlar we haýwanlar üçin kislorody üpjün etmekde möhüm rol oýnaýar. Fotosintez tebigatyň döreden iň ajaýyp we iň peýdaly mehanizmleriniň biridir.
Ösümlikler diňe bir daşky gurşawda däl, adam durmuşynda hem giň ulanyşa eýedir. Olar iýmit hökmünde, derman serişdeleri üçin, dürli senagatda, hatda sungatda hem ulanylýar. Şeýle hem ösümlikler stres we ýadawlyk bilen göreşmekde adama ruhy rahatlyk we rahatlandyryjy täsir edýär. Ösümlikleriň köp görnüşliligi tebigatyň biologik balansyny saklamaga ýardam edýär. Ýaprakly agaçlardan başlap, kiçijik çöl kaktuslaryna çenli ösümlikler dürli görnüşlerde we meýdanlarda ösüp, tebigatyň durnuklylygyny üpjün edýär.
Häzirki wagtda ekologiýa meseleleriniň ýitileşmegi bilen ösümlikleri goramak has zerur bolýan meseleleriň biri bolup durýar. Agaç oturtmak, tebigatyň hapalanmagyna garşy göreşmek we ösümlikleriň ýaşaýyş şertlerini gowulandyrmak tebigatyň deňagramlylygyny saklamaga uly goşant goşýar.
Ösümlikler tebigatyň janly bir bölegi bolup, olaryň ähmiýeti diňe bir gözellikde däl, eýsem durmuşymyz bilen baglanyşykly ähli ugurlarda duýulýar. Olar hakda alada etmek we goramak diňe bir tebigatyň gözel keşbini saklamaga däl, eýsem geljekki nesilleriň sagdyn we ýaşyl dünýäde ýaşamagyny üpjün etmekde möhüm ädimdir.
Eziz GURTMYRADOW
S.A.Nyýazow adyndaky Türkmen oba hojalyk
uniwersitetiniň mugallymy
