Türkmenistanda ýerleşýän A.S. Puşkin adyndaky bilelikdäki rus-türkmen mekdebinde uçurymlaryň soňky jaň dabarasy geçirildi. Bu möhüm gün okuwçylaryň mekdep durmuşyndaky iň ajaýyp we ýatda galyjy pursatlarynyň biri bolup, olaryň geljekki durmuşa gadam basýandygyny alamatlandyrýar.
Dabara mynasybetli mekdepde baýramçylyk liniýasy guraldy. Şol çärede Russiýanyň Türkmenistandaky Ilçisi Ivan Wolynkin gutlag sözleri bilen çykyş edip, okuwçylara täze başlan ýollarynda uly üstünlikler arzuw etdi. Şeýle hem, mekdebiň mugallymçylyk toparyna yhlasy we çeken zähmeti üçin minnetdarlyk bildirdi.
“Soňky jaň her okuwçy üçin aýratyn bir duýgydyr – ene-atalar, dostlar we mugallymlar bilen bilelikde geçen ýyllaryň netijesi. Bu gün uçurymlar mekdep bilen hoşlaşýar we täze maksatlara, arzuwlara tarap ilkinji ädimlerini ädýär.
Täze ýol size uly üstünlikleri, bagtly pursatlary we döredijilikli gözlegleri getirsin! Goý, her biriňiziň arzuwlaryňyz hasyl bolsun we täze mümkinçilikler size elýeterli bolsun!”
