2025-nji ýylyň 16-njy iýunynda Türkmenistanyň Daşary işler ministrliginiň Halkara gatnaşyklary institutynyň uçurymlarynyň baýramçylyk dabarasy geçirildi. Oňa Türkmenistanyň Daşary işler ministrliginden wekilleri, institutyň professor-mugallymlarydyr talyplary, şeýle hem uçurymlaryň hossarlary gatnaşdylar. Bu barada Türkmenistanyň Daşary işler ministrliginiň Halkara gatnaşyklary institutynyň resmi saýtynda 16-njy iýunda habar berildi.
Baýramçylyk dabarasynda institutyň professor-mugallymlary, halypa diplomatlar gutlag sözleri bilen çykyş edip, uçurymlara ak ýol, üstünlik arzuw etdiler. Dabaranyň dowamynda uçurym talyplaryň ata-eneleri hoşallyk sözlerini bildirdiler.
Habarda bellenilişine görä, 2024-2025-nji okuw ýylynda hünärmen maksatnamasy boýunça talyplaryň 78-si, şeýle hem magistrleriň 79-sy türkmen diplomatiýasynyň milli mekdebini üstünlikli tamamladylar. Institutyň resmi saýtynda bar bolan maglumatlara görä, 2021-2022-nji okuw ýylyndan başlap, institutda bakalawr maksatnamasy esasynda bilim berlip başlanypdy. 2024-2025-nji okuw ýylynda bolsa ilkinji gezek bakalawr maksatnamasy boýunça talyplaryň 44-si uçurym boldular. Umumylykda, uçurymlaryň 12-si ýokary okuw mekdebini tapawutlanan diplom bilen tamamlamagy başardylar. Dabaranyň dowamynda olara Hormat hatlary we ýadygärlik sowgatlary gowşuryldy.
Ýeri gelende bellesek, 2009-njy ýyldan başlap institut öz uçurymlaryny işe ýollap ugrady. 2009 — 2024-nji ýyllar aralygynda uçurymlaryň 856-sy instituty tamamlap, şolaryň 124-si tapawutlanan diploma mynasyp boldular. Şeýle-de 2022-nji ýylda ilkinji gezek 31 sany magistr okuwy tamamlap, olaryň 4-si tapawutlanan diploma mynasyp boldular. 2023-2024-nji ýyllarda bolsa magistrleriň 115-si okuwy tamamlap, olaryň 5-si tapawutlanan diplom aldylar.
Uly ruhubelentlige beslenip geçen dabaranyň dowamynda uçurymlaryň talyplyk ýyllaryna degişli pursatlardan wideoşekilleriň görkezilmegi özboluşly tolgunmalary döretdi.
Baýramçylyk dabarasy joşgunly aýdym-sazly çykyşlar bilen utgaşdy. Institutyň aýdym-saz we döredijilik toparynyň talyplary özleriniň sahna ussatlygyny görkezip, geljekki halkaraçy hünärmenler hökmünde daşary ýurt dillerinde aýdymlary ýerine ýetirdiler.
